Shymkent transformator zaýyty ónimin eksportqa shyǵara bastady
«Asia Trafo» JShS zaýyty BAQ ókilderi úshin arnaıy press týr uıymdastyryp, zaýyttyń búgingi jumysyn keńinen tanystyrdy. Búgingi tańda Shymkent qalasynyń «Tassaı» ındýstrııalyq aımaǵynda 12 gektar aýmaqta ornalasqan joǵary tehnologııaly zaýyt Qazaqstandaǵy elektrotehnıkalyq jabdyqtardy jetekshi óndirýshi «Alageum Electric» kompanııasynyń quramyna kirip otyr. Elimizdiń elektrotehnıkalyq salasyn damytýda zor mańyzy bar kásiporyn jabdyqtary ózindik biregeı tehnologııa boıynsha jasalǵan. «Alageum Electric» kompanııasy quramyna kiretin kásiporyn jylyna 120 transformator shyǵarýǵa qaýqarly. 500-den astam adamdy jumyspen qamtyp otyr. Búginde jańa kásiporyn alǵashqy tapsyrystardy qabyldap, eń iri satyp alýshy KEGOC elektr jelilerin basqarý jónindegi qazaqstandyq kompanııaǵa 500 kV ushtastyrýshy reaktorlardy jasaýda. Kásiporyn basshylary zaýyttyń alǵashqy ónimin Shymkentke jáne Túrkistan oblysynda ornatýdy josparlap otyr.
Aıta keteıik, kásiporynnyń qurylysy QR ındýstrııalyq-ınnovatsııalyq damý memlekettik baǵdarlamasynyń (IIDMB) sheńberinde 2017 jyly bastalǵan bolatyn. Jobanyń jalpy quny shamamen 18,9 mlrd teńgeni quraǵan. Qazaqstannyń Damý Banki arqyly zaýytqa 8,7 mlrd teńgege jýyq kólemdegi qarjy 12 jylǵa qaryz retinde berilip, Damý bankiniń enshiles uıymy QDB-Lızıng te 5,9 mlrd teńge somasynda qarjylandyrý usyndy. Mamandar zaýyttyń áleýmettik-ekonomıkalyq tıimdiligi joǵary ekenin alǵa tartady. Jobanyń josparly qýatqa shyǵýy kezinde kásiporynnan óńir jáne el ekonomıkasyna 2 mlrd teńgege jýyq salyq túsimderi túsedi dep kútilýde.
«Zaýyt Kentaý men Oraldaǵy transformator zaýyttary enetin, TMD elderi men Pákistan, Aýǵanystan naryǵyna shyǵyp júrgen «Alageum Electric» kompanııasynyń quramyna kiredi. Óndiris orny bıylǵy jylǵa 7 mlrd teńgeniń transformatoryn shyǵarýdy josparlaýda. Qazir kásiporyn basshylyǵy ishki naryqty zerttep, elimizdegi alpaýyt kompanııalardan tapsyrystar qabyldap jatyr. Reseıge eksporttaý jaǵy da josparlanýda. Ázirge Tájikstan, Qyrǵyzstan jáne Ózbekstannan tapsyrystar qabyldanǵan. Jyl sońyna deıin 30 transformator shyǵarý kózdelip otyr»,- deıdi Qazaqstan Damý Bankiniń Basqarýshy dırektory Ádil Ismaǵambetov.
