Shymkent tótenshe jaǵdaı aıaqtalǵansha karantınge jabyldy
M.Áıtenov qalada koronavırýspen kures sharalary tıisti deńgeıde júrgizilip jatqanyn málimdedi. Sondaı-aq ol Shymkentte indet juqtyrǵandar sany 11-ge jetkenin aıtty.
– Azamattardyń ómiri men qaýipsizdigin, densaýlyǵyn saqtaý maqsatynda 2020 jylǵy 4 sáýiri saǵat 21.00-den bastap tótenshe jaǵdaı aıaqtalǵanǵa deıin Shymkent qalasy aýmaǵynda karantın jarııalanady.
Karantın mynandaı shekteý sharalaryn qamtıdy:
Birinshiden, karantın kezinde Shymkent qalasy bas sanıtarynyń qaýlysynda kórsetilgen mekemelerden bólek menshik nysanyna qaramastan barlyq mekemelerdiń jumysy toqtatylady. Ol mekemelerdiń tizimin ákimdiktiń resmı saıty men áleýmettik jelilerde jarııalaımyz. Qoǵamdyq demalys oryndary, sonymen qatar saıabaqtar men balalar alańshalaryna barýǵa bolmaıdy.
Ekinshiden, turǵyndar men kóliktiń barlyq túrine Shymkent qalasynan shyǵýǵa jáne qalaǵa kirýine tyıym salynady. Bul shekteýdiń Qaýlyda kórsetilgen belgili azamattar men kólikterge qatysy joq. Olardyń da tizimi jarııalanady.
Úshinshiden, qala aýmaǵynda shaǵyn mıkroavtobýstardyń qozǵalysyna tyıym salynyp, olardyń baǵyttary boıynsha avtobýs qozǵalysy qoıylady. Qalaishilik qoǵamdyq kólik qozǵalysy tańǵy 07.00-den 19.00-ge deıin ǵana júzege asady.
Tórtinshiden, qala aýmaǵyndaǵy zalalsyzdandyrý sharalary karantın merzimi aıaqtalǵanǵa deıin kúsheıtiletin bolady.
Besinshiden, azamattardyń júrip-turýyna shekteý qoıylady. Bul turǵyndardyń ózin-ózi oqshaýlaýy úshin jaǵdaı jasaýǵa baǵyttalyp otyr. Mundaı shekteýler medıtsına qyzmetkerlerine, quqyq qorǵaý organdarynyń ókilderine, qala tynys-tirshiligin qamtamasyz etýshi kommýnaldyq mekeme qyzmetkerlerine qoldanylmaıdy.
Qala turǵyndary tolyqtaı shekteý kezinde úılerinen azyq-túlik, dári-dármek, medıtsınalyq kómek, bank jáne poshta qyzmetterin alý úshin ǵana shyǵa alady.
Sońǵy kúnderi áleýmettik jelilerde tarap jatqan túrli negizsiz aqparattar taralýynyń aldyn alý maqsatynda, qala aýmaǵynda kommendattyq saǵat ázirshe engizilmegenin resmı túrde málimdeımin. Degenmen tótenshe jaǵdaı kezindegi talaptardy oryndaýymyz kerek. Karantın rejımin buzǵan azamattardy quqyq qorǵaý organdarynyń patrýldik qyzmeti anyqtaıtyn bolady. Sebebi óziniń densaýlyǵyna nemquraıly qaraǵan azamattardyń áreketinen turǵyndardyń basym bóligi zardap shekpeýi tıis dep sanaımyn.
Altynshydan, Shymkent qalasynyń aýmaǵyndaǵy tótenshe jaǵdaı jáne karantın kezinde 55 jastan asqan turǵyndarǵa asa bir qajettiliksiz kóshege shyqpaýdy usynamyz.
Jetinshiden, karantın kezinde tizim boıynsha jumysy toqtamaǵan barlyq mekemeler qyzmetkerin jumys orny týraly anyqtamamen qamtamasyz etýi shart.
Segizinshiden, azyq-túlik bazarlarynyń jumys ýaqyty 10:00-den 18:00-ge deıin, qadamdyq qashyqtyqtaǵy azyq-túlik dúkenderiniń jumys ýaqyty 10:00-den 21:00-ge deıin bolyp qalady.
Toǵyzynshydan, barlyq qoǵamdyq tamaqtaný oryndary jetkizip berý rejımine kóshedi.
Onynshydan, azamattardyń qala aýmaǵynda jeke kóligimen júrýine tyıym salynady. Bul talap tizimge kiretin mekeme qyzmetkerlerine qoldanylmaıdy jáne ol azamattardyń qolynda jumys orny bergen anyqtama bolýy kerek. Sondaı-aq, jeke kólikpen úıiniń janynda ornalasqan azyq-túlik pen birinshi kezektegi taýarlar, medıtsınalyq quraldar alýǵa jáne jedel jaǵdaılarda medıtsına uıymdaryna kómek alýǵa barýǵa bolady, dedi.
Sóz sońynda qala basshysy:
– Qalanyń tynys-tirshiligi toqtamaýy úshin qala ákimdigi barlyq sharalardy qabyldaıdy.
Osyndaı qıyn sátte, Shymkentti jan-tánimen súıetin árbir turǵynǵa qalamyz bizdiń kómegimizge zárý ekendigin aıryqsha atap ótkim keledi. Qalamyzǵa tıgizer kómegimiz – bul bizdiń birkisideı karantın talaptaryn buljytpaı oryndaýymyzda ekendigin atap ótemin, dedi.