Shymkent: tolassyz jańbyr saldarynan sý basqan Eltaı aýylynda qaýip seıildi

ShYMKENT. QazAqparat – Shymkentte tolassyz jaýǵan jańbyr saldarynan sý shaıǵan Eltaı aýylynda qaýip seıildi. Tabıǵı apattan atalǵan eldi mekende 60 aýla men 60-qa tarta nysandy sý basyp, 5 sharýashylyq nysan qıraǵan, dep habarlaıdy QazAqparat tilshisi.

Qalalyq TJD málimetinshe, tabıǵı apattyń saldaryn joıý boıynsha jedel shtab qurylǵan. Sondaı-aq, №6506 áskerı bóliminiń kúshimen kanaldardy tazalaý, tereńdetý jáne arnany túzetý jumystary júrgizilýde. Qazirgi tańǵa deıin 7000 m3 sý sorylǵan.

«Sý basqan aýmaqtan 300 adam, onyń ishinde 124 bala evakýatsııalandy. 294 adam týysqandaryna jáne 6 adam №119 OM bazasynda evakýatsııalyq pýnktke ornalastyryldy. Oqıǵa ornyna jaqyn mańdaǵy 4 mektepte qosalqy evakýatsııalyq pýnkt daıyndalyp, tótenshe jaǵdaıdyń saldaryn joıý jumystary júrgizilýde. Oǵan TJD 133 qyzmetkeri 10 tehnıkasy jáne 19 motopompamen, jergilikti aýyldyq okrýgtiń 46 qyzmetkeri 31 tehnıkasymen, 6506 áskerı bóliminiń 100 qyzmetkeri 4 tehnıkasymen jumyldyryldy. Qazirgi tańda jaǵdaı turaqty baqylaýda. Aýla ýchaskelerinen sýdy sorý jumystary júrgizilýde», delingen habarlamada.

Aıta keteıik, keshe saǵat 19.14-te Eńbekshi aýdany, Eltaı eldi mekenine Túrkistan oblysynyń Tólebı aýdanynan sekýndyna 3-5 tekshe metr sý kelgen. Sýdyń deńgeıi 20-50 sm quraǵan. Kóp mólsherde kelgen sýdan aryq arnasynan asyp, sonyń saldarynan turǵyn úılerdiń aýlalaryn sý basqan.