Shymkent «TMD elderiniń mádenı astanasy» estafetasyn qabyldap aldy

NUR-SULTAN. QazAqparat - Belarýs Respýblıkasynyń Brest qalasynda «Brest – TMD elderiniń 2019 jylǵy mədenı astanasy» is-sharasynyń jabylý saltanaty ótti. Saltanatty sharada Brest qalasy 2020 jylǵy TMD-nyń mádenı astanasy estafetasyn Shymkentke resmı túrde tabys etti, dep habarlaıdy QazAqparat.

Dostyq pen ózara yntymaqtastyqty óristetken jıynǵa 2020 jylǵy TMD-nyń mádenı astanasy mártebesin ıelengen Shymkent qalasynan arnaıy ókilder qatysty. Shymshahardyń mereıin asyrǵan mártebeli sharaǵa úshinshi megapolısten delegatsııany Shymkent qalasy ákiminiń birinshi orynbasary Qaırat Nurtaı bastap bardy. Merekelik shara sheńberinde Shymkent qalasy ishki saıasat jáne din isteri basqarmasynyń basshysy Janar Bektaeva, sondaı-aq fototilshiler qalamyzdyń týrıstik jáne tarıhı-mádenı áleýetin tanystyrdy.

Shara aıasynda TMD Memleketaralyq gýmanıtarlyq yntymaqtastyq qorynyń (MGYQ) otyrysy ótip, onda Brest qalasynda Dostastyqtyń mádenı astanasy retinde atqarylǵan jumystary saralanyp, onyń qorytyndysy talqylandy. BAQ ókilderi úshin arnaıy baspasóz jıyndary uıymdastyrylyp, qonaqtar «Brest qorǵany» memorıaldyq keshenine baryp, Máńgilik alaýǵa gúl shoqtaryn qoıdy.

Budan soń keshkisin Brest akademııalyq drama teatrynda «Brest – TMD elderiniń 2019 jylǵy mədenı astanasynyń» qorytyndy jabylý saltanaty ótti. Merekelik kontsertke TMD elderiniń úzdik ónerpazdary qatysty. Al halyqaralyq «Dostastyq debıýtteri» premııasynyń laýreattary qonaq retinde shaqyryldy. Saltanatty shara Brest qalalyq atqarýshy komıteti tóraǵasynyń delegattardy arnaıy qabyldaýymen aıaqtaldy.