Shymkent-Tashkent turaqty avtobýs baǵdary jyl sońyna deıin ashylady
ASTANA. QazAqparat - Jyl sońyna deıin Shymkent pen Tashkent arasynda turaqty avtobýs qatynaı bastaıdy, dep habarlaıdy QazAqparat.
«Memleket basshysy Nursultan Nazarbaev «2006 jylǵy 20 naýryzdaǵy Qazaqstan Respýblıkasynyń Úkimeti men Ózbekstan Respýblıkasynyń Úkimeti arasyndaǵy Halyqaralyq avtomobıl qatynasy týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» Zańǵa qol qoıdy. Hattama avtomobıl kólik quralymen jolaýshylardy turaqty, turaqsyz jáne tranzıttik tasymaldaý úshin quqyq normalaryn zańdastyrady. Atap aıtqanda, Shymkent-Tashkent turaqty avtobýs baǵdaryn ashý, al kelesi jyly eki eldiń basqa da iri qalalary arasynda qatynasty retteý josparlanǵan», - dep atap ótilgen QR Investıtsııalar jáne damý mınıstrliginiń málimetinde.
2000 jyldyń basynan beri Qazaqstan men Ózbekstan arasynda jolaýshylardy avtobýspen tasymaldaý bolmaǵan. Kúndelikti eki eldiń memlekettik shekarasynan 20 myńnan astam adam ótedi. Avtobýs baǵdarynyń ashylýy eki eldiń saýda-ekonomıkalyq qatynastarynyń damýyna oń serpin beredi dep kútilýde.
Budan buryn habarlanǵandaı, QR Investıtsııalar jáne damý mınıstri Jeńis Qasymbek búginde Qazaqstan men Ózbekstan arasynda jolaýshylar tasymaly boıynsha turaqty avtobýs marshrýty joqtyǵyn aıtqan edi.
Bul óz kezeginde shekarany ótý kezinde qolaısyz jaǵdaıǵa alyp keledi.
«Sol sebepti Hattama kúshine engennen keıin osy jyly Shymkent-Tashkent qalalary arasynda, al kelesi jyly elderdiń basqa qalalarymen qatynas boıynsha turaqty avtobýs baǵdarlaryn ashý josparlanýda. Eki eldiń arasynda avtobýs baǵdarlaryn ashý saýda-ekonomıkalyq baılanysty odan ári damytýǵa oń serpin beredi, sondaı-aq halyqtyń mobıldiligin arttyrýǵa jáne ekijaqty qarym-qatynasty nyǵaıtýǵa yqpal etedi», - dedi mınıstr.
