Shymkent syra zaýytynyń aýmaǵynda órt boldy
ShYMKENT. QazAqparat - «Shymkentsyra» zaýytynyń aýmaǵynda órt boldy, dep habarlaıdy QazAqparat.
Kýágerler órtti vıdeoǵa túsirip alǵan. Tótenshe jaǵdaılar komıtetiniń aldyn ala málimetteri boıynsha, eski aǵash shpaldar men arnaıy ydystarda uzaq ýaqyt boıy turyp qalǵan maı janǵan.
«Maı jaǵylǵan eski shpaldardyń 5 tekshe metri men paıdalanylǵan maı quıylǵan 5 ydys jandy. Órt saǵat 15-05-te aýyzdyqtalyp, 15-48-de sóndirildi. Oqıǵanyń saldarynan zardap shekkender men mert bolǵandar joq. Jalyn sharpyǵan aımaq 225 sharshy metrdi qurady»,-dep málimdedi Tótenshe jaǵdaılar jónindegi komıtettiń resmı ókili Rýslan Imanqulov.
Órtti sóndirýge 56 órt sóndirýshi men 9 tehnıka jumyldyryldy.
Órttiń shyǵý sebebi anyqtalýda.
