Shymkent sottarynda Prezıdent Joldaýyn túsindirý jumysy júrgizilýde

ShYMKENT. QazAqparat – Memleket basshysy Qasym-Jomart Toqaevtyń Joldaýynyń sot júıesine qatysty baǵytyn aqparattyq-túsindirý maqsatynda Shymkent qalalyq, aýdandyq jáne oǵan teńestirilgen sottarda birqatar jumystar atqarylyp jatyr, dep habarlaıdy QazAqparat tilshisi.

Qalalyq sottyń málimetinshe, aýdandyq jáne oǵan teńestirilgen sottardyń tóraǵalary men sýdıalary Joldaýdy túsindirý boıynsha jergilikti turǵyndarmen, oqý oryndarynyń basshylarymen, stýdenttermen jáne mektep ujymdarymen kezdesýler ótkizdi.

Atap aıtqanda, Qarataý aýdandyq sotynyń tóraǵasy E.Rahmanberdi Aımaqtyq áleýmettik-ınnovatsııalyq ýnıversıteti stýdentteriniń qatysýymen press-týr jáne «Ashyq esik kúnin» uıymdastyrdy. Eńbekshi aýdany Juldyz aýmaqtyq okrýginde aýdandyq sottyń tatýlastyrýshy sýdıasy Q.Izbasarov «Joldaýǵa qoldaý» taqyrybynda aýdan ákimi men prokýratýra jáne qalalyq ákimdik ókilderiniń qatysýymen halyqpen kezdesti.

Al, Abaı aýdanynda ornalasqan № 4 kolledjde aýdandyq sottyń BAQ-pen ózara is-qımyl jónindegi úılestirýshi-sýdıa I.Gavrıkova men BAQ jumysyna jaýapty maman B.Malikova baryp, kolledj basshylyǵymen jáne stýdenttermen kezdesý ótkizdi.

Shymkent qalasynyń mamandandyrylǵan ákimshilik sotynyń sýdıasy A.Beknazarov M.Saparbaev atyndaǵy Túrkistan oblysynyń Gýmanıtarlyq ınstıtýtynda «Sottarda jumystyń zamanaýı formattaryn jáne sottardyń jańa elektrondy servısterin tanystyrý» taqyryby boıynsha zań fakýltetiniń stýdentterimen kezdesti. Ál-Farabı aýdandyq sotynyń uıymdastyrǵan «Ashyq esik kúnine» «Mıras» ýnıversıtetiniń stýdentteri kelip, aýdandyq sottyń ǵımaratyn aralap kórdi.

Sot tóraǵasy N.Jeksembıev olarǵa sot otyrystaryn ótkizý tártibi týraly áńgimelep berdi.

Osyndaı on kezdesýdiń barysynda sýdıalar Joldaýdyń sot júıesine qatysty baǵytyn jan-jaqty aıtyp túsindirdi.