«Shymkent-sıtı» jobasy aıasynda 300-den astam kópqabatty turǵyn úı salynady
ShYMKENT. QazAqparat - Shym shaharda «Shymkent-sıtı» jobasy aıasynda 300-den astam kópqabatty turǵyn úı boı kóteredi. Kólemi 427 gektardy quraıtyn qalashyq 70 myńǵa jýyq turǵynǵa eseptelgen, dep habarlaıdy QazAqparat HAA tilshisi.
Zamanaýı úlgide salynyp jatqan qalashyqta 316 kópqabatty úı soǵylady. 9, 12, 16 qabattan turatyn baspanalar qurylysynyń ortalyǵynda kólemi 49 ga bolatyn saıabaq alańy ornalaspaq. Qala ákiminiń orynbasary Nuralhan Kósherovtyń aıtýynsha, «Shymkent-sıtıde» janǵa jaıly qajettiliktiń bári qarastyrylmaq. Áleýmettik nysandar - mektepter men balabaqshalar, emhanalar jáne shaharlyqtardyń tynyǵatyn oryndary boı kóteredi dep kútilýde.
«3500 kórermenge arnalǵan kıno-kontsert zalyn salýdy uıǵaryp otyrmyz. Munan bólek, ázirge, «Shymkent-arena» dep atap otyrǵan sport kesheniniń qurylysy bastalady. Munda, eń bastysy, shahar turǵyndary úshin qolaıly jaǵdaı jasaý. Jobamyzdyń ishinde aýdany 24 ga bolatyn bıznes-ortalyqtyń qurylysyn salý da kózdelgen», - deıdi Nuralhan Kósherov.
Qala ákimi orynbasarynyń málimetinshe, qazirgi tańda qalashyqta kóshe qurylysy men 10 úıdiń (árqaısysy 54 páterden turady) ınjenerlik-kommýnıkatsııalyq jumystary júrgizilýde.
«Úıler beriktigi jaǵynan joǵary sanatty quramaly temirbetondy konstrýktsııalardan boı kóteretin bolady. Bul - kommýnaldy úıler. Osy jyly bes kópqabatty úıdiń qurylysyn aıaqtaımyz dep josparlaǵanymyzben, baspanalardyń paıdalanýǵa berý ýaqyty kommýnıkatsııalyq qajettilikterdiń barlyǵy ornalastyrylyp bolǵannan soń ǵana, 2018 jylǵa kelisilgen», - dedi ákim orynbasary.
Al, mundaǵy kommýnıkatsııalyq jumystar «Nurly jer» baǵdarlamasy aıasynda iske asyrylýda. Bul jumystar keler jyly aıaqtalyp, paıdalanýǵa berilmek. Dese de, joldardyń basym bóligi osy jyly tóseledi dep josparlanýda. Aıaqjoldar men velosıpedterge arnalǵan kóshelerdi salý kezegi kelesi jyldyń enshisine qalyp otyr. Óıtkeni, aıaqjoldar túsetin nysandarǵa bıyl kommýnıkatsııalyq qajettilikter júrgiziletin bolady.
Aıta keteıik, «Shymkent-sıtı» qalashyǵy shahardyń soltústik aımaǵynda, Báıdibek bı eskertkishine taıaý mańda ornalasqan. Aýdan zamanaýı ınfraqurylymymen, turmysta, bıznesti bastaýda qolaıly jaǵdaıymen jáne eń joǵary qala qurylysy men sáýleti jóninen erekshelenedi. Atalǵan joba Shymkenttiń 2020 jylǵa deıingi damý tujyrymdamasy aıasynda iske asyrylýda. Keleshekte munda 7 mektep pen 21 balabaqsha salynbaq.
