Shymkent polıtseıleri ózin óltirmek bolǵan jas qyzdy qutqaryp qaldy
Qalalyq PD baspasóz qyzmetiniń málimetinshe, keleńsiz jaǵdaı Túrkistan oblysynyń Shardara aýdanynda bolǵan.
«Kúndizgi saǵat 15:50 shamasynda kezekshi bólimge jergilikti turǵyndar habarlasyp, jas qyzdyń jardan sekirgeli jatqanyn aıtqan. Osy kezde Shardara qalasyna issaparmen kelgen Shymkent qalalyq mamandandyrylǵan kúzet qyzmeti basqarmasynyń aǵa ınspektory, polıtsııa kapıtany Keńes Erimbetov pen áriptesi Ábdirashıt Serjan Shardara sý qoımasynan 500 metr qashyqtyqta aǵyp bara jatqan adamdy kórip qalǵan. Osy jaǵdaıdy kórgen polıtseıler dereý sýǵa sekirip, qyzdy qutqarǵan» delingen habarlamada.
Adam ómirin qutqaryp qalǵan tártip saqshylary ornymyzda kim bolsa da, osylaı isteıtin edi deıdi.
«Ekeýmiz jardyń janynan aınalyp sýǵa túsip, qyzǵa qutqarý kıimin kıgizdik. Ony sýdyń taıaz jerine alyp shyqtym. Sol kezde bekettegi polıtsııa qyzmetkerleri medıtsına qyzmetkerleri men jergilikti polıtsııany, tótenshe jaǵdaılar qyzmetkerlerin shaqyryp qoıǵan eken. Olar ýaqytyly kelip, alǵashqy kómek kórsetti», - deıdi polıtsııa kapıtany Keńes Erimbetov.
Polıtseıler jas qyzǵa medıtsınalyq jáne psıhologııalyq kómek kórsetken. Keıinnen jas qyzdyń Shardara aýdanynyń turǵyny ekeni anyqtaldy. Atalǵan jaıt boıynsha QR QK 105-babymen is qozǵalyp, aldyn ala tergeý tizilimine tirkelgen. Qazir boıjetkenniń ne úshin mundaı áreketke barǵany tekserilip jatyr.
