Shymkent pen Túrkistan oblysynda sý basqan úıler joq
NUR-SULTAN. QazAqparat - Shymkent qalasy men Túrkistan oblysynda sý basqan úıler men aýlalar joq. Bul týraly QR ІІM Tótenshe jaǵdaılar komıtetinen málim etti, dep habarlaıdy QazAqparat tilshisi.
«Qutqarýshylardyń, jergilikti atqarýshy organdardyń sý sorý, aryqtardy tazartý jáne tereńdetý jumystarynyń arqasynda Shymkentte jáne Túrkistan oblysynyń Tóle bı, Qazyǵurt, Báıdibek, Saıram, Túlkibas aýdandarynda sý basqan úıler men aýlalar joq. Sonymen qatar Badam men Keles ózderiniń jaǵalaýlaryn nyǵaıtý jumystary júrgizildi. Evakýatsııalanǵan adamdar úılerine oraldy», - delingen komıtet aqparatynda.
Vedomstvo málimetinshe, qutqarýshylardyń, jergilikti atqarýshy organdardyń kúshimen Shymkent qalasynda 9 myń tekshe metr sý soryldy. Jaǵalaýlardy nyǵaıtý jumystary barysynda 750 myń tonna ınertti materıal qoldanylyp, polıtsııa qoǵamdyq tártipti qorǵaýdy qamtamasyz etti.
Apattyq qutqarý jumystaryna Shymkent qalalyq TJD jeke quramynyń 168 mamany, 19 tehnıkasy, 21 motopompasy, jergilikti atqarýshy organdardyń 74 qyzmetkeri, 55 tehnıkasy, QR Ulttyq ulanynyń 100 áskerı qyzmetshisi men 4 tehnıkasy jumyldyryldy.
Al Túrkistan oblysynyń joǵaryda atalǵan aýdandarynda 2 myń tekshe metr sý sorylyp, jaǵalaýlardy nyǵaıtý jumystaryna 1 200 tonna ınertti materıal paıdalanyldy. Tótenshe jaǵdaı saldaryn joıý jumystaryna oblystyq TJD jeke quramynyń 52 mamany, 15 tehnıkasy, 15 motopompasy, jergilikti atqarýshy organdardyń 241 qyzmetkeri men 33 tehnıkasy tartyldy.
«Tótenshe jaǵdaı ornynda zardap shekken halyqqa kómek kórsetý jáne keltirilgen shyǵyndy baǵalaý úshin komıssııa jumys istep jatyr»,- dep atap ótedi vedomstvodan.
