Shymkent pen Qyzylordadaǵy kóshelerge Qazaq radıosynyń aty berildi
Qazaq radıosy ujymynyń usynysyn qala ákimi Murat Áıtenov qoldap, qalalyq máslıhat otyrysynda sheshim qabyldandy. Kósheniń uzyndyǵy - 1900 metr.
Saltanatty ashylý rásimine arnalǵan sharaǵa Shymkent qalasy ákiminiń birinshi orynbasary Shyńǵys Muqan, satırık, radıo ardageri Kópen Ámirbek, radıo ardageri Saýyq Jaqanova, «Qazaq radıolary» JShS Almaty stýdııasynyń jetekshisi Baqyt Jaǵyparuly, «Shalqar» radıosynyń dırektory Bolatbek Tólepbergen jáne zııaly qaýym ókilderi qatysty. Shymkent - radıo atyna kóshe berip otyrǵan elimizdegi alǵashqy qala.
«Shymkent qalasynyń ákimi M.Áıtenovtiń usynysymen, qalalyq máslıhattyń hatshysy Bahadyr Narymbetov bastaǵan depýtattardyń qoldaýymen «Qazaq radıosyna» kóshe aty berildi. Búgin Assambleıa zalynda «Shymkentten sóılep turmyz» atty shaǵyn kontsert ótedi. Qazaq únin 100 jyldan beri darhan dalamyzǵa jetkizip kele jatqan «Qazaq radıosynyń» ǵasyrlyq mereıtoıy qutty bolsyn!», - dedi qala ákiminiń orynbasary Sh.Muqan saltanatty rásimde sóılegen sózinde.
Sonymen qosa Qyzylorda qalasynan da kóshelerdiń birine Qazaq radıosynyń aty berildi. Oblystyq máslıhat sheshimi jaqyn kúnderi Ádilet basqarmasynan tirkeýden ótip, qaladaǵy burynǵy «Saıahat-11» kóshesi «Qazaq radıosy» kóshesi bolyp qaıta atalady. Qyzylorda qalasyndaǵy Qazaq radıosy kóshesiniń uzyndyǵy – 400 metr. Radıo elimizdiń sol kezdegi astanasy Aqmeshitten 1925 jyldary áýe tolqynyna shyqqan.
Qazaq radıosy 1921 jyldyń qazan aıynda ult ustazy Ahmet Baıtursynulynyń bastamasymen Orynbor qalasynan aqparat tarata bastady. Radıonyń 100 jyldyǵyn atap ótý boıynsha is-sharalar jospary bekip, bıyl jyl boıy rýhanı-mádenı jobalar júzege asady.
