Shymkent pen Kentaý ákimdigi Arysta 636 turǵyn úıdi qalpyna keltirdi

ARYS. QazAqparat – Arys qalasyndaǵy 10 sektordyń qurylys jumystaryn Shymkent pen Kentaý qalasyn birlesip júrgizdi. Sektordaǵy 580 úıde jóndeý jumystary júrgizilse, 56 baspana jańadan salynǵan, dep habarlaıdy QazAqparat tilshisi.

10 sektordyń jaýapty ókili Toqbergen Baekeevtiń aıtýynsha, jóndeý jumystaryna 17 qurylys kompanııasy men myńǵa tarta qurylysshy, 22 tehnıka jumyldyrylǵan. Jańadan salynǵan turǵyn úılerdiń shatyrlary jabylyp, áınekteri men terezeleri qoıylǵan. Qazir birqatar úılerde ishki árleý jumystary júrgizilýde.

«Bastapqyda jóndeledi degen 2 úı keıinnen jaramsyz dep tanylyp, qaıta buzýǵa týra keldi. Qyrkúıek aıynyń basynda bul úıler qaıta salyndy. Qazirgi tańda ishki sylaqtaryn jasaý kerek. Sonymen qatar keıbir úılerde lınoleýmder tóselip, sońǵy jumystaryn aıaqtaý ǵana qaldy. Qurylysshylar qalpyna keltirý jumystaryn mejelengen ýaqytta bitiredi degen oıdamyz»,- deıdi Toqbergen Baekeev.

Barlyq jumystarǵa 2 mlrd teńgeden astam qarajat jumsalǵan. Jalpy qıyn-qystaý sátte qoldaý bildirip, arystyqtarǵa demeý bolǵan №10 sektordaǵy Shymkent qalasy men Kentaý qalasy ákimdikterine jergilikti turǵyndardyń alǵysy sheksiz.