Shymkent pen Qaraǵandy Konfederatsııa Kýbogynyń jartylaı fınalyna shyqty
QR Boks federatsııasynyń baspasóz qyzmeti málim etkendeı, sporttyq jekpe-jek jáne kúsh qoldanylatyn sport túrleri Konfederatsııasy Kýbogy jolyndaǵy jarystyń shırek fınaldyq kezdesýleri aıaqtaldy.
Bıylǵy jyly bokstan ótip jatqan básekeniń basty ereksheligi - salmaq dárejeleriniń onnan segizge qysqarýy. Bul Halyqaralyq olımpıada komıteti usynyp otyrǵan jańashyldyqtarǵa baılanysty bolyp otyr. Halyqaralyq olımpıada komıteti bul ózgertýler jaıly talqylaýlardy 2017 jyly bastaǵan bolatyn. Áıelder osy ýaqytqa deıin tek 3 salmaq boıynsha bylǵary qolǵap túıistirip kelse, endi olımpıada oıyndarynda taǵy eki salmaq qosylady dep josparlanǵan. Al er azamattarda kerisinshe 2 salmaq dárejesi qysqartylmaq. Osylaısha áıelder 5 salmaqta, al erler 8 salmaqta rıngke shyqpaq. Bul bastamalardy Halyqaralyq boks qaýymdastyǵy (AIBA) 2020 jyly Tokıoda ótetin olımpıadada engizýi yqtımal. Qazaqstan boks federatsııasy bapkerler keńesiniń sheshimine sáıkes, jańa erejeler qazirden bastap qoldanysqa engiziledi. Sondyqtan 2018 jylǵy Konfederatsııa Kýbogy jarysynda 49 jáne 56 kelige deıingi salmaqtar alynyp tastalmaq. Jerebe qorytyndysy boıynsha qazirgi tańda barlyq oblystyq komandalar 4 topqa bólinip ózara baq synasýda.
A toby: Almaty oblysy, Batys Qazaqstan oblysy, Pavlodar jáne Qaraǵandy oblystary.
V toby: Astana, Atyraý oblysy, Soltústik Qazaqstan men Shyǵys Qazaqstan óńirleri.
S toby: Shymkent, Jambyl oblysy, Qostanaı men Aqtóbe oblystary.
D toby: Mańǵystaý oblysy, Almaty qalasy, Qyzylorda men Aqmola oblystary.
A tobynan Qaraǵandy oblysy top jarsa, S tobynda Shymkent qalasynyń boksshylary oq boıy ozyp shyqty. V jáne D toptarynyń shırek fınaldyq kezdesýleri osy aptada Qyzyljar men Aqtaý qalalarynda ótedi. Jartylaı fınalda boks, kúres jáne thekvondodan jekpe-jekter bir ýaqytta bolady. Fınaldyq oıyndar Táýelsizdik kúni qarsańynda uıymdastyrylmaq.