Shymkent ónerkásip óniminiń kólemi boıynsha respýblıkada kósh bastap tur

ShYMKENT. QazAqparat – Shymkent qalasy elimizde ónerkásip óniminiń kólemi boıynsha respýblıkada kósh basynda keledi. Bul týraly aqparattyq-kommýnıkatsııalyq brıfıngte qalalyq kásipkerlik jáne ındýstrıaldy-ınnovatsııalyq damý basqarmasy basshysynyń mindetin atqarýshy Bereke Dúısebekov málimdedi, dep habarlaıdy QazAqparat tilshisi.

Bereke Dúısebekovtyń sózinshe, qaladaǵy ónerkásip óniminiń kólemi 406,9 mlrd teńgeni quraǵan. Bul kórsetkish aldyńǵy jylmen salystyrǵanda 18,1 paıyzǵa artqan jáne respýblıkadaǵy óńirler arasynda kósh bastap tur.

«Ónerkásip salasynda úlesi 85,8 paıyzdy quraıtyn óńdeý ónerkásibinde 349, 2 mlrd teńgeniń ónimi óndirilip, ósim-15,3 paıyzǵa jetti. Bul kórsetkish 2018 jyldyń 9 aıynda – 301,6 mlrd teńgeni quraǵan bolatyn», - deıdi Bereke Dúısebekov.

Sondaı-aq, búgingi tańda, qaladaǵy ınvestıtsııalyq jobalardy tıimdi iske asyrý maqsatynda jobalyq keńse qurylyp, nátıjesinde 2019-2024 jyldary quny 1,9 trln teńgeni quraıtyn 15 myńǵa jýyq jańa jumys oryndary men 166 ınvestıtsııalyq joba anyqtalyp otyr. Onyń ishinde 21 jobanyń 650 mlrd teńgesi shetel ınvestorlarynyń esebinen quıylady dep boljanǵan. Tıisinshe, jobalyq keńse sheńberinde atalǵan árbir jobaǵa jol kartasy ázirlenýdeen.

«2019 jyldyń sońyna deıin 48,1 mlrd teńgeni quraıtyn jańa 1 200 jumys oryndarymen 18 jobany iske asyrý josparlanǵan. Onyń ishinde, quny 24,2 mlrd teńgeni quraıtyn 4 ınvestıtsııalyq joba shetel ınvestorlarynyń qatysýymen iske asyrylýda», - deıdi basqarma basshysynyń mindetin atqarýshy.

Aıta keteıik, 2019 jyldyń basynan qazirgi ýaqytqa deıin quny 6,2 mlrd teńgeni quraıtyn 8 ınvestıtsııalyq joba iske qosylǵan. Al, qalǵany jyl sońyna deıin júzege asady dep josparlanǵan.