Shymkent munaı óńdeý zaýytynda josparly jóndeý jumystary aıaqtaldy
ShYMKENT. QazAqparat - Shymkent munaı óńdeý zaýytynda júrgizilgen kúrdeli jóndeý jumystary aıaqtaldy, dep habarlaıdy QazAqparat tilshisi.
«PetroQazaqstan Oıl Prodakts» JShS baspasóz qyzmetiniń málimetinshe, zaýyttyń ári qaraı uzaq merzimge toqtaýsyz jáne apatsyz jumys isteýin qamtamasyz etý maqsatynda negizgi jáne qosalqy tsehtardyń tehnologııalyq jáne sorapty-kompressorlyq jabdyqtary jóndelgen. Qubyr jelileri men óndiristik peshteri, elektr jabdyqtary men baqylaý-ólsheý aspaptary, sondaı-aq avtomatıka quraldary tehnıkalyq kýálandyrýdan jáne jóndeýden ótkizilgen. Budan bólek, birlesip jumys júrgizý josparyna sáıkes árekettegi tehnologııalyq qondyrǵylar men zaýytty jańǵyrtý jobasy aıasynda salynǵan iri tehnologııalyq nysannyń - RFCC katalıtıkalyq krekıng qondyrǵysy kesheniniń jańa qondyrǵylaryn bir-birine biriktirip, qosý jumystary júrgizildi. Kúrdeli jóndeý jumystary aıaqtalǵannan keıin óndiristiń tehnologııasyna jáne qaýipsizdik erejelerine sáıkes zaýyttyń tehnologııalyq qondyrǵylary iske qosylyp, taýarly ónim shyǵaryla bastaǵan.
Aıta keteıik, buǵan deıin atalǵan zaýyttyń kúrdeli jóndeý jumystarynyń bastalýyna baılanysty ýaqytsha toqtatylǵanyn habarlaǵan bolatynbyz. Zaýytty jańǵyrtý jumystary barysynda RFCC katalıtıkalyq krekıng kesheniniń jańa nysandary men shymkenttik MÓZ-diń qoldanystaǵy nysandaryn ıntegratsııalaý boıynsha is-sharalardy atqarý josparlanǵan edi.
