Shymkent munaı óńdeý zaýytynan «shyqqan» órt sóndirildi
ShYMKENT. QazAqparat - Shymkenttiń munaı óńdeý zaýytynda shartty órt sóndirildi. Óńirdiń órt sóndirýshileri tez tutanǵysh suıyqtyqty saqtaıtyn jáne paıdalanatyn nysandaryndaǵy órtti sóndirý boıynsha daǵdylaryn mashyqtaý, basshy quramnyń osyndaı nysandardaǵy órtti sóndirý barysyna jetekshilik jasaý daǵdylaryn jetildirý maqsatynda órt-taktıkalyq jattyǵýyn ótkizdi, dep habarlaıdy QazAqparat tilshisi.
Jattyǵý kezinde aldyn ala daıyndalǵan stsenarııge sáıkes, munaı saqtaý qoımasyndaǵy rezervýardyń quıylmaly estakadasynda benzın tasymaldaýshy avtokólikke AI-92 markaly janar-jaǵarmaı quıý kezinde órt oryn aldy. Ot taralyp jaqyn ornalasqan estakadalarǵa taralý qaýipin týǵyzyp, uoıma qyzmetkerleri órt sóndirý baılanys ortalyq pýnktine habarlaıdy.
Tótenshe jaǵdaılar qyzmetkerleri bolsa órttiń qaýip dárejesi úlken ekendigin eskerip, joǵary shaqyrý jarııalaıdy. Mekemeniń qyzmetkerleri qaýipsiz aımaqqa kóshirilip, jattyǵý ornyna kúshter men quraldar jetti. Óńirdiń TJD kúshteri men quraldary jetkenshe munaı bazasynyń jedel den qoıý kúshteri apattardy joıý boıynsha daıyndyǵyn kórsetti. Órt ornyna kelý barysynda órt sóndirý shtaby qurylyp, 380 Vt quraıtyn elektro jelisi óshirildi. AI-92 janar-jaǵarmaıynyń odan ári taralýyna jol berilmeı, sondaı-aq shartty órtti sóndirýge arnalǵan quraldar tasymaldandy.
Órt-taktıkalyq jattyǵýǵa qatysýshylardyń alǵa qoıylǵan máselelerdi sheshý úshin qoldanǵan sharalary nátıjesinde shartty túrdegi órt 9 saǵat 49 mınýtta oqshaýlanyp, 10 saǵat shamasynda tolyq sóndirildi.
Esterińizge sala keteıik, ótken 2017 jyly atalǵan munaı bazasynyń aýmaǵynda iri órt shyǵyp, bir jumysshy qaza tapqan edi.
