Shymkent munaı óńdeý zaýyty provızorlyq stantsıonarǵa qorǵanysh quraldaryn jetkizip berdi

ShYMKENT. QazAqparat – Shymkenttegi «PetroQazaqstan Oıl Prodakts» JShS men «Shymkent – qaıyrymdy qala» áleýmettik qory birlesip, Covid-19 ınfektsııasymen kúrestiń aldyńǵy sapynda júrgen medıtsınalyq uıymǵa gýmanıtarlyq kómek kórsetti.

Atalmysh kompanııa ókilderi № 2 qalalyq aýrýhanaǵa qarasty provızorlyq stantsıonarǵa 10 myń medıtsınalyq betperde men 1 myń dana qorǵanysh kıimderin jetkizdi, dep habarlaıdy QazAqparat tilshisi.

Juqpaly indetpen kúreste eńbek etip júrgen dárigerlerge alǵysyn bildirgen seriktestik ókili Rınat Aqberdıev kompanııa tarapynan aldaǵy ýaqytta taǵy da qoldaý bolatynyn jetkizdi.

Aıta keteıik, búginde qaladaǵy provızorlyq ortalyqtarda 3610 tósek oryn bolsa, onyń 260-sy osy №2 qalalyq aýrhanaǵa qarasty. Búgingi tańda munda 200 naýqas em qabyldap jatyr. Ortalyq qajetti dári-dármekter men tynys alý qondyrǵylarymen tolyq qamtylǵan. Buǵan deıin qala ákimdigi tarapynan provızorlyq stantsıonarǵa qosymsha 6 IVL apparaty jetkizilgen bolatyn.