Shymkent munaı óńdeý zaýyty qalypty tehnologııalyq jumys rejımine 13 shildede kóshedi

ASTANA. QazAqparat - Búgin «QazMunaıGaz» UK AQ (QMG) Basqarma tóraǵasy Maǵzum Myrzaǵalıev Shymkent munaı óńdeý zaýytynda («PQOP» JShS) bolyp, janar-jaǵarmaı materıaldaryn óndirý jáne jóneltý jumystarynyń barysymen tanysty, dep habarlaıdy QazAqparat Ulttyq kompanııanyń baspasóz qyzmetine silteme jasap.

Qazirgi kezde «PQOP» JShS táýligine 3500-5000 tonna avtobenzın, 2 500 tonna dızel otynyn, 1 000 tonna avıaotyn, 600 tonnaǵa deıin suıytylǵan gaz jóneltip jatyr. Munaıdy bastapqy óńdeý qondyrǵysy men munaıdy tereń óńdeý kesheni táýligine 10 500 tonna júktemesimen jumys istep tur.

Búgingi tańda zaýyttaǵy janar-jaǵarmaı qorynyń kólemi: benzın 22 000 tonna, dızel otyny 30 800 tonna, avıakerosın 5 800 tonna, mazýt– 11 600 tonna.

«PQOP» JShS prezıdenti Erbolat Qojabaev 22 000 tonna avtobenzın qorynyń, sondaı-aq táýligine óndiriletin 2000-2500 tonna esebinen zaýyttyń jóndeý jumystary júretin 11 kún ishinde táýligine 4000-4500 tonna avtobenzın jóneltýge múmkindigi jetetini týraly baıandady.

«Zaýyt qalypty jumys kezinde orta eseppen táýligine 5000 tonna avtobenzın jóneltip turdy. Qazirgi jóndeý jumystaryna qaramastan, bul kólem aıtarlyqtaı ózgerissiz qaldy, jumys qalypty júrip jatyr deýge bolady. Máselen, búgin kásiporynnan 7 000 tonna benzın jóneltildi», - dedi ol.

Sonymen qatar, zaýyt basshysy QMG Basqarma tóraǵasyna katalızatordy iske qosý jáne oktan sany joǵary benzın komponentin óndiretin katalıtıkalyq rıformıng qondyrǵysyndaǵy T-251 jylý almastyrǵyshty jóndeý barysy týraly aıtty. Jóndeý jumystaryna jylý almastyrǵyshty jasap shyǵarǵan zaýyttyń mamandary jumyldyrylǵan.

Shymkent munaı óńdeý zaýyty mamandarynyń aıtýynsha, katalızatordy iske qosý jáne jylý almastyrǵyshty jóndeý jumystary 11 shildede aıaqtalady. Al, zaýyt qalypty tehnologııalyq jumys rejımine 13 shildede shyǵa bastaıdy.

«PQOP» JShS basshylyǵymen ınjenerlik-tehnıkalyq qyzmetkerlermen jınalys ótkizgen Maǵzum Myrzaǵalıev: «Osynda Atyraý qalasynan kelip otyrmyn. Atyraý munaı óńdeý zaýytynda boldym. Jaǵdaı baqylaýda. Zaýyt qondyrǵylary tehnologııalyq rejımge birtindep qosylýda. 6 shildege qaraı zaýyt tolyǵymen qalypty rejımge shyǵady dep josparlanyp otyr. Munaı ónimderi barlyq munaı óńdeý zaýyttarynan jóneltilip jatyr. Elimiz boıynsha AI-92 men dızel otynyń jetkilikti qory bar, sondyqtan Atyraý zaýytynyń qysqa ýaqytqa toqtaýy jáne Shymkent zaýytyndaǵy ishinara jóndeý jumystary ishki naryqqa keri áserin tıgizbeıdi» - dedi.

Aıta keteıik, Atyraý munaı óńdeý zaýyty 3 shilde kúni jergilikti ýaqytpen saǵat 17:25-te jumysyn toqtatty. Buǵan «KEGOC» AQ tarapynan elektr energııasynyń óshirilýi sebep boldy.

Sondaı-aq Elektr qýatynyń joqtyǵynan Atyraý munaı óńdeý zaýyty jumysyn toqtatqany habarlandy.