Shymkent munaı óńdeý zaýyty Eýro-4 jáne Eýro-5 standartyndaǵy janarmaı shyǵarýdy bastady
ASTANA. QazAqparat - Shymkent munaı óńdeý zaýytyn jańǵyrtý jobasynyń birinshi kezeńi aıaqtaldy. Nátıjesinde munaı óńdeý sapasy 80 paıyzǵa artyp, ónim shyǵarý kólemi jylyna 6 mln tonnaǵa, janarmaı óndirisi 3 ese kóbeıdi, dep habarlaıdy OQO ákimdiginiń baspasóz qyzmeti.
Eń bastysy - janarmaı sapasy Eýro-4 jáne Eýro-5 ekologııalyq standartyna kóshti. Tarıhı oqıǵaǵa qatysty ótken saltanatty jıynǵa Qytaı Halyq Respýblıkasynyń CNPC kompanııasy Bas dırektory Bıan Dyjy men Ońtústik Qazaqstan oblysynyń ákimi Janseıit Túımebaev qatysyp, zaýyt jumysyna sáttilik tiledi.
«Elbasymyz halyqqa arnaǵan Joldaýynda elimizdi óz munaı ónimderimen qamtamasyz etý kerektigin basa aıtqan bolatyn. Osy tapsyrmaǵa saı Shymkent munaı óńdeý zaýytynda jańǵyrtý jumystary júrgizildi. Bul jumystar "Údemeli ındýstrııalyq-ınnovatsııalyq damý" memlekettik baǵdarlamasy aıasynda júzege asyrylyp otyr. Qazirde atalǵan baǵdarlamanyń aıasynda Qazaqstannyń úsh iri munaı óńdeý zaýytyn jańǵyrtý jáne qaıta jóndeý jumystary júrgizilýde. Búgin mine birinshi kezeńniń iske asýyna kýá bolyp otyrmyz», - dedi Janseıit Túımebaev.
Jańǵyrtý jumystarynyń birinshi kezeńinde Shymkent munaı óńdeý zaýytynda shıkizatty ydystarǵa sańylaýsyz quıatyn qondyrǵy iske qosyldy. Sondaı-aq qýaty jylyna 1,5 mln. tonna dızel otynyn gıdrotazalaıtyn jáne jylyna 4 myń tonna kúkirt óndiretin qondyrǵy iske qosylyp jumys isteı bastady. Aıta keteıik, ınnovatsııalyq tyń tehnologııalar avtomatty túrde basqarylady.
Mamandardyń aıtýynsha, budan bylaı aýa lastanbaıdy. Eń bastysy - zaýyttaǵy jumystardyń bári qaýipsiz iske asyrylatyn bolady. Kásiporyn mundaı múmkindikke «Údemeli ındýstrıaldy ınnovatsııalyq damý» baǵdarlamasy aıasynda qol jetkizip otyr.
Esterińizge sala keteıik, 2 kezeńnen turatyn Shymkent munaı óńdeý zaýytyn jańǵyrtý jobasy «Údemeli ındýstrıaldy ınnovatsııalyq damý» baǵdarlamasy aıasynda 2011 jyly bastalǵan bolatyn. Jobanyń bas merdigeri - Qytaılyq SRESS kompanııasy. Jobany iske asyrýǵa 30-da asa jergilikti merdiger kompanııalar tartylǵan. Búginde zaýyt aktsııasy «QazMunaıGaz-ÓM» AQ men qytaılyq «SNPC» kompanııasyna tıesili. 
Sondaı-aq zaýytta jylyna 4 myń tonna kúkirt shyǵarylady. Qurylymdaý jumystarynyń ekinshi kezeńi tolyq aıaqtalsa, zaýyt elimizdegi álemdik talaptarǵa saı iri kásiporynǵa aınalatyn bolady. Jyl saıyn Shymkent munaı óńdeý zaýytynan ishki, sondaı-aq syrtqy naryqtarǵa 4 mln tonnaǵa jýyq munaı ónimderi tıep jóneltiledi.
