Shymkent MÓZ-diń qaıta iske qosylatyn ýaqyty aıtyldy
ShYMKENT. QazAqparat - Shymkenttiń munaı óńdeý zaýyty mamyr aıynyń orta tusynda qaıta iske qosylady, dep habarlaıdy QazAqparat tilshisi «PetroQazaqstan Oıl Prodakts» JShS baspasóz qyzmetine siltememen.
Baspasóz qyzmetiniń málimetinshe, Shymkent munaı óńdeý zaýytynyń josparly jóndeý jumystaryn júrgizý merzimi buǵan deıin 45 kúnge sozylǵan. Al bıylǵy jyly bul merzim edáýir qysqartylyp otyr. Sebebi, jóndeý jumystarynyń basym bóligi aıaqtalyp qoıǵan.
Aıta keteıik, zaýyttyń tehnologııalyq qondyrǵylaryna josparly aldyn alý-jóndeý jumystaryn júrgizý kestesi Qazaqstan Respýblıkasy Energetıka mınıstrligimen aldyn ala kelisilgen bolatyn. Kúrdeli jóndeý jumystaryn júrgizý ónerkásiptik qaýipsizdik talaptaryn oryndaýǵa, jabdyqtardyń senimdi jumys isteýin jáne de kásiporynnyń sapaly ári úzdiksiz jumys isteýin qamtamasyz etýge baǵyttalǵan. Zaýytty jańǵyrtý jumystary barysynda RFCC katalıtıkalyq krekıng kesheniniń jańa nysandary men shymkenttik MÓZ-diń qoldanystaǵy nysandaryn ıntegratsııalaý boıynsha is-sharalar atqarylýda.
Eske salaıyq, Shymkenttiń munaı óńdeý zaýyty 10 sáýir kúni jumysyn toqtatqan bolatyn. Zaýytty jańǵyrtý jobasynyń birinshi kezeńi 2017 jyly aıaqtaldy. Al, ekinshi kezeńin aǵymdaǵy jyldyń úshinshi toqsanynda aıaqtaý josparlanǵan.
