Shymkent mektepterinde ata-analardan aqsha jınalmaıtyn boldy

ShYMKENT. QazAqparat - Shymkenttiń mektepterinde endi ata-analardan aqsha jınalmaıtyn boldy. Astana men Almaty qalalarynda júıege qoıylǵan «Qamqorshylyq keńesi» budan bylaı Shymkentte de óz jumysyn bastaıdy. Bul týraly QR Bilim jáne ǵylym mınıstriniń keńesshisi Maırash Taıkenova qatysqan dóńgelek ústelde belgili boldy, dep habarlaıdy QazAqparat tilshisi.

Ustazdardyń basyn qosqan jıynǵa Shymkent qalalyq bilim salasyndaǵy baqylaý departamentiniń basshysy Janat Tájıeva, qalalyq máslıhat depýtattary men orta mektepterdiń dırektorlary, ata-analar jáne birqatar mektepterde óz jumysyn bastap úlgergen qamqorshylyq keńes músheleri qatysty. Basqosýda sóz alǵan Janat Tájıeva  qamqorshylyq keńestiń jumystary Shymkenttiń barlyq 140 mektebinde ashylǵanyn atap ótti.
 

«9 adamnan qurylǵan qamqorshylyq keńesi mektep ómirindegi barlyq is-sharalardy baqylaıdy. Tipti, mektep dırektoryn da saılaıdy. Mektep dırektory ár jarty jyldyqta qamqorshylyq keńeske esep beredi. Qamqorshylyq keńes músheleri dırektordyń jumysyna qanaǵattanbaǵan jaǵdaıda onyń jumysyn toqtatýǵa quqyly»,- dedi qalalyq bilim salasyndaǵy baqylaý departamentiniń basshysy.

 Jıynda sonymen qatar ár mektepte ata-analardan aqsha jınaý toqtatylyp,  qamqorshylyq keńes sol bilim oshaǵynyń jeke esep-shotyn ashatyny aıtyldy. Sol arqyly demeýshi tartyp, odan  túsken qarajat oqýshylardyń qajettiligine jumsalmaq. Demeýshi tarapynan aýdarylǵan qarajat kólemi jáne onyń qaıda, qalaı jumsalǵanyn árbir ata-ana bilýge quqyly. Bul - ata-analardan aqsha jınaýdy túbegeıli boldyrmaýdy kózdeıtin joba,- deıdi mamandar. Sondyqtan bilim salasynyń jaýapty qyzmetkerleri ata-analardy osy baǵytta jumyla jumys isteýge shaqyrdy.