Shymkent mańynda buzylǵan avtobýstaǵy 34 ózbekstandyq qonaq úıge ornalastyryldy

ShYMKENT. QazAqparat – «Tashkent-Almaty» baǵytyndaǵy jolaýshylar avtobýsy buzylyp, ondaǵy 34 Ózbekstan azamatyna kómek kórsetildi, dep habarlaıdy QazAqparat tilshisi.

Tashkentten Almatyǵa jolǵa shyqqan avtobýs Shymkent qalasynyń mańyndaǵy Bozaryq aınalma tasjolynda buzylyp qalǵan. Oqıǵa ornyna jedel jetken Shymkent qalasy TJD qyzmetkerleri 34 jolaýshyny qonaq úıge jetkizdi.

«Shymkent qalasy TJD «112» qutqarý qyzmetine saǵat 2:52 shamasynda avtobýs jolaýshylaryna kómek qajettigi týraly habarlama kelip tústi. Jeke quramnan 7 adam jáne 2 tehnıka oqıǵa ornyna baryp, jolda qalǵan azamattarǵa kómek kórsetti. Jolaýshylar sýyq kúnde dalada qaldyrmaı kómek kórsetken mamandarǵa alǵystaryn aıtty», - delingen Shymkent qalasy TJD qoǵammen baılanys toby taratqan habarlamada.

Foto: Shymkent qalalyq TJD