Shymkent qutqarýshylary begemotqa kómek kórsetti

ShYMKENT. QazAqparat - Qalalyq haıýanattar baǵynyń ákimshiligi Shymkent qalasy TJD «112» qutqarý qyzmetine habarlasyp, begemotqa kómek qajet ekenin aıtty. Onyń tómengi azý tisteri ósip ketkendikten, tamaqtanýy qıyndaı túsken, dep habarlaıdy QazAqparat TJM baspasóz qyzmetine silteme jasap.

«Jedel-qutqarý jasaǵynyń qutqarýshylary zoobaq basshylyǵynyń ruqsatymen alpınıst qural-jabdyqtarynyń kómegimen janýardyń jaq súıegin kerip, gıdravlıka keskishti qoldana otyryp, kedergi keltirgen tisterdi kesip tastady. Endi salmaǵy 3,5 tonnadan asatyn gıpoppotam uzaq emdeý kýrsynan ótpek», delingen habarlamada.

Aıta keteıik, haıýanattar baǵynyń basshylyǵy 2019 jyly da qutqarýshylarǵa osyndaı ótinish jasaǵan bolatyn.

Ol kezde Tursyn laqap atymen tanymal gıppopotamnyń azý tisteri ósip tumsyǵyna kirip ketken bolatyn.