Shymkent kóshelerinen «Naýryz kerýeni» júrip ótti
Atalǵan sharaǵa zııaly qaýym ókilderi men ata- ájeler, etnomádenı birlestikterdiń ókilderi, men teatr ártisteri jáne jastar qatysty. Tizbeginde túıeler men at arba, kúımeler men avtokólikter tizilip júrgen kerýen áýeli «Naýryz» alańyna jınaldy. Barlyǵy 100-den asa adam engen kerýenshiler osy alańnan jolǵa shyǵyp, qalanyń ortalyq kóshelerimen júrip ótti. Jastar jaǵy atqa otyrsa, arbaǵa mingen ájeler men ónerpazdar, etnomádenı birlestikterdiń ókilderi halyq ánderi men kúılerinen shashý shashty. Jol-jónekeı baýyrsaq pen táttiler taratyp, turǵyndarǵa merekelik kóńil kúı syılady. Sońynan merekelik shara uıymdastyrylyp, jınalǵan kópshilik Naýryz kójeden dám tatty. Kúbiden túsken maı men tabada pisken ystyq nan, baýyrsaqtan aýyz tıdi.
Shara barysynda Qazaqstan halqy Assambleıasy tóraǵasynyń orynbasary Muratáli Qalmuratov pen belgili ardager-jýrnalıst Baıdýlla Qonysbek, Isamýdın Rysbaı syndy abyroıly azamattar jurtshylyqty Ulystyń Uly kúnimen quttyqtap, izgi nıetterin bildirdi.
«Ulystyń uly kúni búginde yntymaq pen yrystyń mereıli merekesine aınaldy. Halyqty bereke-birlikke bastap, olardy jaqsylyq pen meıirimdilikke, mahabbat pen shattyqqa bólep keledi. Naýryzda barsha jurt ótkenin elektep, búginin baǵamdaǵan. Renishti umytyp, keshirimshil ári keńpeıil bolyp, ótkenge salaýat, barǵa qanaǵat etken. Ata-babamyzdyń osyndaı ónegeli dástúrin qasterlep, dáýirimizge saı úılestirip damytý - asyl paryzymyz», - dedi Baıdýlla Qonysbek.
«Barmaq birikpeı, ıne ilikpeıdi» degendeı, eldiń aýyzbirshiligi men yntymaǵyn osy áz-Naýryzdan bastaǵan qala jurtshylyǵy ulystyń uly kúnin osylaı bastap ketti. Aǵarǵan aqtyqtyń, bal shyryn toqtyqtyń belgisi dep biletin jalpyhalyqtyq mereke aldaǵy kúnderi de keń kólemde atalyp ótilmek.
