Shymkent kóshelerindegi aryq-atyzdardy jóndeýge 386 mln teńge bólinedi

Bul týraly máslıhat depýtattarynyń 2017-2019 jyldarǵa arnalǵan qala bıýdjetin naqtylaǵan sessııasynda málim boldy. Halyq qalaýlylary ótken jyly kirister boıynsha túsken qarajatty osy maqsatqa jumsamaq, dep habarlaıdy QazAqparat HAA tilshisi.  

Osynaý qarajat endi oblys ortalyǵyndaǵy kóshelerdi jóndeýge, aryq-atyzdardy retteýge bólinedi. Sebebi, sońǵy kezde tolassyz jaýǵan jaýyn-shashyn shahardyń ırrıgatsııalyq júıeleri qandaı jaǵdaıda ekenin kórsetip berdi. Osy máselege oraı syn aıtqan qala ákimi Ǵabıdolla Ábdirahymov sala basshylaryna kóshelerdegi júıelerdi kúzge deıin qalpyna keltirýdi tapsyrǵan bolatyn.

Jobaǵa sáıkes, qaladaǵy kóshelerdi ortasha jóndeýden ótkizý jumystary kelesi aıdan bastalady. Bul maqsatqa bıyl 100 mln teńge qaralyp otyr. Sondaı-aq, bıyl  jol aıryqtaryn kúrdeli jóndeýden ótkizý men ortalyq kóshelerdi keńeıtý josparlanyp qoıǵan.

Depýtattar ótken jyldan artyq túsken qarajattyń taǵy bir bóligin mektepterdegi ystyq tamaqqa jáne jastardy Astanada ótetin EKSPO-2017 halyqaralyq kórmesine qatystyrý úshin jumsaý qajettigin aıtty.