Shymkent kóshelerinde 1 mln jýyq gollandyq qyzǵaldaq ósip tur

ShYMKENT. QazAqparat – Shymkenttiń sımvolyna aınalǵan qyzǵaldaqtar búginde búr jaryp, qalanyń kórkin aıshyqtaı tústi, dep habarlaıdy QazAqparat tilshisi.

Shymkent kóshelerine egilgen qyzǵaldaqtar gúldep, qala turǵyndary men qonaqtarǵa kóterińki kóńil-kúı syılaýda.

Bir ǵana ál-Farabı aýdany aýmaǵynda bıyl qyzǵaldaqtyń 300 000-nan astam dáni egilgen.

Al, Qarataý aýdanynda 250 myńnan astam qyzǵaldaq ósip tur.

Jalpy qala boıynsha sary, qyzyl, kók, kúlgin tústi qyzǵaldaqtardyń 1 mln danasy aınalma joldar men ortalyq kóshelerge, saıabaqtar men gúlzarlarǵa otyrǵyzylǵan.

«Shymkent qalasynyń sımvolyna aınalǵan túrli-tústi qyzǵaldaqtar úshinshi megapolısti odan saıyn ajarlandyra tústi. Kózdiń jaýyn alatyn ásem gúlder kúz mezgilinde egilgen bolatyn. Al, jazǵa qaraı olardyń ornyna birjyldyq gúlder otyrǵyzylady. Jazdyq gúlder de saıabaqtar men qala kósheleriniń kórkine kórik qosatyny sózsiz» - deıdi ál-Farabı aýdanynyń ákimi Rashıd Myńbaev.