Shymkent qolǵa tıetin aılyǵy eń tómen óńirler qatarynda tur
Ranking.kz resýrsy birinshi toqsannyń qorytyndysy boıynsha eldegi ortasha aılyqtyń kólemine taldaý jasady.
«Búkil salyq tólengennen keıin qalatyn «taza» jalaqy mólsheri boıynsha túzilgen reıtıngide Qazaqstan 106 eldiń ishinde 80-shi orynǵa ıe boldy. Qazaqstandyqtardyń jalaqy mólsheri 414,29 dollardy qurady. Eń joǵary jalaqy Shveıtsarııada, Sıngapýrde jáne Avstralııada tirkeldi. Al tómengi jalaqy Shrı Lankada tirkelgen. TMD elderiniń arasynda Reseıdiń (884,14 AQSh dollary), Ýkraınanyń (512,66 AQSh dollary) jáne Armenııa (420,68 AQSh dollary) kórsetkishi Qazaqstannan joǵary», - dep jazady Ranking.kz.
Portaldyń málimetine súıensek, eldegi nomınaldy ortasha aılyq jyldyń birinshi toqsanynda 285,4 myń teńgege jetken.
«Bul bir jyl burynǵy kórsetkishten 23,7% kóp. Aılyqtyń satyp alý qabileti shynaıy kólemde 12,7% ósti» dep jazylǵan taldaýda.
Óńirler arasynda eń joǵary aılyq ádettegideı Atyraý oblysynda baıqalyp otyr – 477,9 myń teńge. Bul eldegi ortasha aılyq mólsherinen 67,4% joǵary.
Ekinshi oryndaǵy Mańǵystaý oblysynda bul shama – 416,2 myń teńge. Nur-Sultan qalasy 366,5 myń teńgemen úshinshi orynda tur.
Al Almaty qalasynda aılyq kólemi ortasha respýblıkalyq kórsetkishten joǵary – 327,5 myń teńge.
Eń az aılyq Soltústik Qazaqstan oblysynda - 203,4 myń teńge. Sondaı-aq, Shymkent qalasynda ortasha aılyq kólemi 216,9 myń teńge, Jambyl oblysynda 220 myń teńge bolǵan.
«Salalar bólinisinde eń kóp jalaqy taý-ken óndirý ónerkásibi jáne karerlerdi qazý salasynda baıqaldy – 619,4 myń teńge. Bul ortasha respýblıkalyq kórsetkishten 2,2 ese kóp. Jyldyq ósim 21,5% qurady. Kóshbasshy salalardyń úshtigine qarjy jáne saqtandyrý qyzmeti salasy (521,1 myń teńge) jáne kásibı, ǵylymı jáne tehnıkalyq qyzmet segmenti (416,4 myń teńge) kirdi», - dep atap ótti Ranking.kz.
Buǵan deıin postdoktoranttarǵa eńbekaqysy 500 myń teńge bolatyn 1000 grant bólinetini aıtylǵan edi.
