Shymkent kásipkeri múmkindigi shekteýli búldirshinderge eki balabaqsha salyp berdi

ShYMKENT. QazAqparat - Búgin Shymkentte  múmkindigi shekteýli búldirshinderge arnalǵan korrektsııalyq qos balabaqsha ashyldy. Barlyǵy 110 orynǵa laıyqtalǵan nysandar  kásipker-metsenat, «Qazaqstannyń 100 jańa esimi» jobasynyń jeńimpazy Qaırat Moldaseıitovtiń demeýshiligimen salyndy, dep habarlaıdy QazAqparat tilshisi.

Oblystyq máslıhat depýtaty, «OTAÝ grýp» kompanııasynyń prezıdenti Qaırat Moldaseıitov Elbasynyń «Bolashaqqa baǵdar: rýhanı jańǵyrý» baǵdarlamasy aıasynda balabaqshanyń qurylysyna 280 mln teńge bólgen. Mektepke deıingi nysandar №17 «Dostyq» jáne №37 «Áıgerim» balabaqshalary dep ataldy.

Jańa ortalyqtardyń ashylý saltanatynda  sóz alǵan oblys ákimi Janseıit Túımebaev balǵyndarǵa arnalǵan arnaýly  balabaqshalardyń bala tárbıesinde mańyzdylyǵyn atap ótti.

«60 jáne 50 oryndyq eki balabaqsha búginnen bastap el ıgiligi úshin paıdalanýǵa tapsyrylady. Onyń biri  «Áıgerim»  balabaqshasy - psıhıkalyq damýy shekteýli balalarǵa arnalǵan. Ekinshisi «Dostyq»  balabaqshasy - tirek-qımyl fýnktsııalary buzylǵan balalarǵa arnap salyndy. Osy bir taǵdyrdyń salǵanyna eriksiz moıynsynǵan jas jetkinshekterimizge qol ushyn sozyp, kómek bergen  Qaırat Quseıinulyna alǵysymyz sheksiz. Osyndaı qoldaý kórsetip, demeýshilik jasap júrgen kásipkerlerdiń eńbekteri ózgelerge úlgi bolarlyq shynaıy patrıotızmniń kórinisteri dep bilemin», - dedi Janseıit Túımebaev.

Aıta keteıik, dál osy kásipker-metsenat jýyrda ǵana Shymkent qalasynyń mıllıonynshy turǵynyna eki bólmeli páterdiń kiltin tabystaǵan bolatyn.

Jalpy, ońtústikke «Rýhanı jańǵyrý» baǵdarlamasy aıasynda kásipkerler demeýshiligimen kóptegen áleýmettik nysandar salynyp, el ıgiligine berilýde.

Mundaı ıgilikti ister áli de jalǵasyn tappaq.