Shymkent qalasynyń qadaǵalaý organdary jylyna bir ret tekseriletin kásipkerlik nasandaryn 4 ret teksermek bolǵan

Bul týraly búgin jýrnalıstermen bolǵan brıfıngte Bas prokýratýranyń resmı ókili Nurdáýlet Súıindikov málim etti.

Onyń sózine qaraǵanda, mundaı tekserýlerdi Shymkent qalasynyń Ál-Farabı aýdanynyń Sanıtarlyq-epıdemıologııalyq qadaǵalaý basqarmasy júrgizbek bolǵan. «Basqarma ókilderi jylyna tek bir ret tekserýge jatatyn jáne sanıtarlyq-epıdemıologııalyq tekserýdi asa qajet etpeıtin 20-dan astam kásipkerlik nysandaryna toqsan saıyn tekserý júrgizý jónindegi sharalardy josparǵa engizgen. Shekten tys tekserý sharalary prokýrorlardyń yqpal etýimen jospardan alynyp tastaldy», - dedi resmı ókil.

Onyń aıtýynsha, osy ýaqytta shaǵyn jáne orta kásipkerlik sýbektileriniń de jaǵdaılary prokýrorlardyń jiti nazarynda. «Búginde elimizdiń barlyq aımaǵynda zańsyz áreketter týraly habar túse qalǵan jaǵdaıda jedel túrde jetip, zańsyz árekettiń aldyn alýmen aınalysatyn toptar jumys isteıdi. Jyl basynan beri osy jedel toptardyń senim telefondaryna 260-tan astam kásipker habarlasyp, zańsyz áreketter jóninde aqparat bergen. Olardyń 150-i boıynsha zańsyz áreketterdiń bolǵany rastaldy», - dedi N.Súıindikov.