Shymkent qalasynyń bas sanıtar dárigeriniń jańa qaýlysy shyqty

ShYMKENT. QazAqparat – Shymkenttiń bas memlekettik sanıtarlyq dárigeri Ashyq jobasyna qatysýshylardyń jumys kestesi kórsetilgen jańa qaýlyǵa qol qoıdy, dep habarlaıdy QazAqparat.

Qujatta meıramhana, dámhana jáne kofehana sııaqty qoǵamdyq tamaqtaný nysandary 50% deıin toltyrylǵan jaǵdaıda saǵat 07:00-den 02:00-ge deıin jumys isteı alatyny aıtylǵan. Biraq nysandaǵy júktelim 70 orynnan aspaýy kerek.

Jazǵy alańdar, saýna men monshalar, SPA ortalyqtary Ashyq júıesinde ádettegi rejımde jumys isteıdi.

Ashyq júıesine qatysýshy fýdkorttarǵa 30% deıin toltyrylǵan jaǵdaıda saǵat 10:00-den 00:00-ge deıin jumys isteýge ruqsat. Biraq oryndar sany 50-den aspaýy kerek.

Teatrlar, kınoteatrlar, kontsert zaldary, fılarmonııalar, boýlıngter, tsırkter tolymdylyǵy 50% aspaı jumys isteı alady. Al PlayStation klýbtary men kompıýterlik klýbtar tolymdyǵy 60% aspaýy shart.

Banket zaldary bir adamǵa keminde 4 sharshy metr alańdy qamtamasyz etý arqyly saǵat 07:00-den 02:00-ge deıin jumys isteı alady. Tolymdyq 50%-dan, oryn sany 70-ten aspaýy kerek.

Karaoke nysandaryna 50% júktelimmen, oryn sanyn 60 adamnan asyrmaı saǵat 07:00-den 02:00-ge deıin jumys isteýge ruqsat etiledi.

Kórmeler bir adamǵa 6 sharshy metrden kem bolmaıtyn alańmen qamtamasyz etilgen jaǵdaıda kelýshi sanyn bir ýaqytta 250-den asyrmaı, tolymdyqty 70%-dan asyrmaı qyzmet kórsete alady.

Qaýlynyń tolyq nusqasyna myna silteme arqyly ótýge bolady.