Shymkent qalasynyń ákimi munaı bazasyndaǵy órtti sóndirgen azamattarǵa alǵys aıtty
ShYMKENT. QazAqparat - Shymkent qalasynyń ákimi munaı bazasyndaǵy órtti sóndirýge kómektesken azamattarǵa alǵys jarııalady. Ǵabıdolla Ábdirahymov barlyq qyzmetkerlerdiń jumyla áreket etýdiń arqasynda qaıǵyly jaǵdaılardyń aldyn alǵandyǵyn atap ótti, dep habarlaıdy QazAqparat HAA tilshisi.
«OQO-nyń TJD barlyq quramyna jáne Shymkent qalalyq TJ basqarmasynyń jeke quramyna munaı bazasyndaǵy rezervýardan shyqqan órtti sóndirýdegi shuǵyl ári naqty áreketteri úshin alǵys bildiremin. Órt sóndirýde jumyla áreket etken jáne shtabty durys uıymdastyrǵan Ońtústik Qazaqstan oblystyq tótenshe jaǵdaı departamentiniń bastyǵy, azamattyq qorǵanys isiniń polkovnıgi Derbısov Nurbolat Bekbolatuly jáne Shymkent qalalyq tótenshe jaǵdaı basqarmasynyń bastyǵy, azamattyq qorǵanys isiniń podpolkovnıgi Jaqsybaev Madııar Esengeldiulynyń jumysyn erekshe atap ótkim keledi. Shymkenttiń barlyq kommýnaldy qyzmetine arnaıy alǵys aıtamyn. Tek sizderdiń jumyla áreket etýlerińizdiń nátıjesinde ǵana qaıǵyly jaǵdaıdyń saldary oryn almady. Sizder órtti kúrdeli jaǵdaıda sóndirdińizder - ekpini qatty jelden qyzyl jalyn kez kelgen sátte sol mańdaǵy basqa rezervýarlarǵa ótip ketýi múmkin edi. Sizderge Shymkenttiń barsha turǵyndary atynan alǵys aıtamyn»,-dedi shahar basshysy
Eske salaıyq, keshe tańǵy 7.51 shamasynda «Shymkent munaı ónimderi» AQ-nyń qoımasynan órt shyǵyp, bir jumysshy qaza tapqan edi. Marqum bolǵan 46 jastaǵy azamat osy qoımada operator bolyp jumys istegen.
