Shymkent qalasynyń ákimi daryndy jastardy marapattady

ShYMKENT. QazAqparat - Shymkent qalasynyń ákimi Ǵabıdolla Ábdiraxymov el táýelsizdigi kúni qarsańynda jastardy qabyldap, olarǵa qurmet kórsetti, dep habarlaıdy QazAqparat tilshisi.

Ákimniń qabyldaýynda bolǵan shymkenttik Meıirjan Shermaǵanbet Býdapesht qalasynda grek-rım kúresinen ótken Álem chempıonatynda  67 keli salmaq dárejesinde qola medaldi jeńip alǵan bolatyn. Al, Jaına Shekerbekova bolsa Nıý-Delıde ótken Álem chempıonatynda áıelder boksynan kúmis medal oljalady. Álemdik dárejede júldeli oryndar alǵan sportshylar aqshalaı syılyqtrǵa ıe boldy. Atap aıtqanda  Jaına Shekerbekovaǵa  2 mln teńge, al Meıirjan Shermaǵanbet 1,5 mln teńge syıaqy tapsyryldy.

Sonymen qatar, kúni keshe ǵana Qazaqstan Respýblıkasy Úkimetiniń «Daryn» memlekettik jastar syılyǵynyń ıegerleri atanǵan jastar da ákimikke arnaıy shaqyrylyp, marapattaldy.

Olardyń qatarynda bokstan Qazaqstan Respýblıkasynyń eńbek sińirgen sport sheberi, áýesqoılar arasyndaǵy bokstan álem chempıony (Germanııa, Gambýrg 2017), bokstan álem chempıonatynyń qola júldegeri (Almaty, 2013), bokstan Azııa chempıonatynyń qola júldegeri (Taıland, 2015) Qaırat Eralıev pen OQMPÝ aıtys ortalyǵynyń jetekshisi Birjan Baıtýov, sondaı-aq Qazaqstan jas sýretshiler Odaǵynyń múshesi, Y. Altynsarın atyndaǵy № 65 mektep-gımnazııasynyń muǵalimi Baýyrjan Jetpisalıev pen jergilikti «Aıǵaq» teleradıokompanııasynyń bas redaktory Saltanat Toıbolova bar. Qala basshysy daryndy jastardy Táýelsizdik kúnimen quttyqtap, olarǵa alǵys hattar men syılyqtar tabys etti.