Shymkent qalasynyń ákimdigi basqa ǵımaratqa kóshti

  ShYMKENT. QazAqparat - Shymkent qalasynyń ákimdigi burynǵy oblys ákimdiginiń ǵımaratyna kóshti. Sheneýnikter ótken tórt kúndik demalysty paıdalanyp, kóshý sharalaryn júrgizgen, dep habarlaıdy QazAqparat.

Ákimdik qyzmetkerleri tipti ǵımarattyń  kire berisindegi «Túrkistan oblysynyń ákimdigi» degen jazýdy «Shymkent qalasynyń ákimdigi» dep almastyryp ta qoıdy. Endi ákimdik qyzmetkerlerin turǵyndar qalanyń «Nursát» shaǵyn aýdanyndaǵy ákimshilik iskerlik ortalyǵynan taba alady.

Eske salaıyq, Elbasynyń Jarlyǵyna sáıkes Túrkistan oblysynyń ortalyǵy Túrkistan shaharyna aýysqan soń, oblys ákimdiginiń qyzmetkerleri 15 tamyzdan bastap sonda kóshken bolatyn.