Shymkent qalasy men Túrkistan oblysynda jaryq baǵasy negizsiz kóterilgen - prokýratýra
ShYMKENT. QazAqparat - Shymkent qalasy men Túrkistan oblysynyń prokýratýralary «Ońtústik Jaryq Tranzıt» JShS-niń 2015-2017 jyldar aralyǵynda elektr energııasy tarıfin qalyptastyrý zańdylyǵyna keshendi tekserý júrgizdi. Tekserý nátıjesi sýbektiniń tarıfterdi qalyptastyrý kezinde jáne paıdalaný barysynda túrli zańbuzýshylyqtarǵa jol bergenin kórsetken, dep habarlaıdy QazAqparat tilshisi.
Prokýratýranyń málimetinshe, atalǵan kompanııa 2016-2017 jyldary 15,8 mln teńge mólsherde aldyn tarıftik smetalarǵa qosylǵan áleýmettik salyq pen áleýmettik jarnalar boıynsha shyǵyndaryn 5% artyq oryndamaǵan. Osylaısha 6,8 mln teńge mólsherde jumysshylardyń medıtsınalyq baıqaýdan ótý qyzmetin tarıftik smetaǵa negizsiz qosyp kelipti. Sóıtip elektr qýatyna tarıfti negizsiz kótergen. Sonymen birge, tekserýde memlekettik satyp alý konkýrstardy ótkizý barysynda zań talaptarynyń saqtalmaǵany jáne 13,3 mln teńge mólsherdegi mindetti salyqtyń esepke alynbaýy (KTS jáne QQS) sııaqty derekter anyqtaldy.
Prokýrorlyq qadaǵalaý aktileri qaralýymen «Ońtústik Jaryq Tranzıt» JShS-ne 22,6 mln teńgege kompensatsııalyq tarıf engizilgen. Sondaı-aq, zańbuzýshylyqtarǵa jol bergeni úshin QR ÁQBtK 164-babynyń 4-bóligimen («Tabıǵı monopolııa sýbektisiniń shekteýlerdi saqtamaýy, sol sııaqty tabıǵı monopolııa sýbektisiniń Qazaqstan Respýblıkasynyń tabıǵı monopolııalar týraly zańnamasynda belgilengen mindetterdi oryndamaýy nemese tıisinshe oryndamaýy») jaýapkershilikke tartylyp, 2 mln teńge kóleminde aıyppul salynǵan.
Al, salyq organyna joldanǵan usynysty qaraý nátıjesinde atalǵan kompanııa QR ÁQBtK 278-babynyń 1-tarmaǵymen («Salyqtardyń jáne bıýdjetke tólenetin basqa da mindetti tólemderdiń somalaryn kemitip kórsetý») ákimshilik jaýapkershilikke tartylyp, 6 mln teńge aıyppul salyndy. Búginde seriktestiktiń memleket aldyndaǵy qaryzdary tolyq óteldi.
