Shymkent qalasy, Aqtóbe men Qostanaı oblystary eń kóp ınvestıtsııa tartqan óńirler

NUR-SULTAN. QazAqparat – Qazaqstanǵa ınvestıtsııa tartý boıynsha Shymkent qalasy, Aqtóbe men Qostanaı oblystary kósh bastap tur. Bul týraly búgin QR Premer-Mınıstri Álıhan Smaıylovtyń basshylyǵymen ótken Investıtsııalyq shtab otyrysynan málim boldy, dep habarlaıdy QazAqparat.

Úkimettiń baspasóz qyzmetiniń habarlaýynsha, Investıtsııalyq shtab otyrysynda 2021 jyly jáne 2022 jyldyń І toqsanynda negizgi kapıtalǵa ınvestıtsııalar tartý (budan ári – NKI) boıynsha nysanaly ındıkatorlardy oryndaý qorytyndylary qaralǵan. Sondaı-aq onda «Valmont Industries» kompanııasynyń mehanıkalandyrylǵan sýarý júıeleri zaýytyn salý jobasyn iske asyrý barysy talqylandy.

Baıandama jasaǵan ulttyq ekonomıka vıtse-mınıstri Іlııas Óserov ótken jyldyń qorytyndysy boıynsha NKI tartý josparlaryn oryndaýda Shymkent qalasy (jospardan 115% – 462,1 mlrd teńge), Aqtóbe oblysy (jospardan 101,8% – 815,6 mlrd teńge) jáne Qostanaı oblysy (jospardan 101,3% – 416,2 mlrd teńge) kósh bastaǵanyn málimdedi.

Atalǵan kórsetkish boıynsha Soltústik Qazaqstan (jospardan 80,4% – 331,9 mlrd teńge), Batys Qazaqstan (jospardan 69,6% – 423,7 mlrd teńge) jáne Qyzylorda (jospardan 66,4% – 302,8 mlrd teńge) oblystary – aýtsaıderler qatarynda.

Memlekettik organdar arasynda QR AShM (jospardan 108,4% – 893,3 mlrd teńge), QR IIDM (jospardan 100,3% – 6 036,7 mlrd teńge) jáne QR TsDIAÓM (jospardan 98,7% – 235,8 mlrd teńge) kósh basynda tur. Jospar QR MSM-de (jospardan 62,8% – 566,6 mlrd teńge) jáne QR DSM-de (jospardan 49,3% – 198,7 mlrd teńge) oryndalmaǵan.

Óńirler men vedomstvolar boıynsha ózge de baıandamashylardy tyńdaǵan Álıhan Smaıylov jańa ekonomıkalyq syn-tegeýrinder tek táýekelderdi ǵana emes, sondaı-aq damýǵa da múmkindikter usynatynyn, sondyqtan barlyq óńirler men memlekettik organdardyń basshylyǵy osy baǵytta jumysty jandandyrýy qajet ekenin atap ótti.

«Biz memlekettik organdarda maqsatty kórsetkishterge qol jetkizýde belgili bir syn-tegeýrinder bar ekenin kórip otyrmyz. Artta qalǵan ortalyq memlekettik organdar men óńirler bul máselege nazar aýdarýy kerek. Negizgi kapıtalǵa ınvestıtsııa tartý jumysyn jandandyrýdy jáne osy máseleni erekshe baqylaýda ustaýdy tapsyramyn. Mınıstrler men ákimder buǵan tikeleı jaýapty», — dedi QR Premer-Mınıstri.

Ekinshi másele boıynsha aýyl sharýashylyǵy mınıstri Erbol Qarashókeev baıandady.

Qazaqstanda «Valmont Industries» kompanııasynyń mashınalar óndirisin damytý fermerlerge sapaly jabdyqty qoljetimdi etedi jáne tıisti aýyl sharýashylyǵy ınfraqurylymynyń damýyna túrtki bolady. Premer-Mınıstr jobamen egjeı-tegjeıli tanysqannan keıin múddeli memlekettik organdarmen birge qosymsha saraptama júrgizýdi jáne taraptardyń mindettemelerin eskere otyryp, ony iske asyrýdyń negizdiligin rastaýdy tapsyrdy.