Shymkent qalalyq densaýlyq saqtaý basqarmasynyń basshysy qyzmetinen ketti

ShYMKENT. QazAqparat - Shymkent qalalyq densaýlyq saqtaý basqarmasynyń basshysy qyzmetin atqarǵan Baqytjan Pozılov óz ótinishimen qyzmetinen bosady. Bul týraly ol facebook paraqshasynda arnaıy jazba qaldyrdy, dep habarlaıdy QazAqparat tilshisi.

Mundaı sheshimdi jeke jaǵdaıǵa baılanysty qabyldaǵanyn aıtqan Baqytjan Joldasbekuly jaqyn adamdarynyń densaýlyǵy men jeke basyna kóbirek kóńil bólý kerek bolǵandyǵyn jetkizgen.

«Sońǵy birneshe aı ishinde men birneshe ret eńbek demalysyna, jalaqysy saqtalmaıtyn demalysqa shyqtym. Basqarma basshysy qyzmeti turaqty jumysty qajet etetinin túsinemin, sonymen qatar jedel túrde ártúrli sheshimder qabyldaý máselesi de bar, osyǵan baılanysty men osyndaı sheshim qabyldadym» - degen ol óz jazbasynda.

Sondaı-aq, qoldaý bildirip, senim artqan qala basshylyǵy men áriptesterine alǵys aıtqan.

Aıta keteıik, Baqytjan Joldasbekuly Pozılov 2020 jyldan beri Shymkent qalalyq densaýlyq saqtaý basqarmasynyń basshysy laýazymyn atqaryp keldi.