Shymkent densaýlyq saqtaý basqarmasy tynys alý apparatynyń bireýin 21 mln teńgege satyp alǵan
«Bul jumysty Shymkent qalasy boıynsha Sybaılas jemqorlyqqa qarsy qyzmeti bastady. Chellendjdi BQO jáne Aqtóbe oblysy boıynsha bólimsheler jalǵastyrdy. Búginde máslıhat sheshimi arqyly bıýdjetke 755 mln teńge qaıtaryldy. Bul - belgilengen utymsyz shyǵyndardyń jalpy kóleminiń 10%», - dedi QR Sybaılas jemqorlyqqa qarsy is-qımyl Agenttigi Preventsııa departamentiniń asa mańyzdy ister jónindegi ofıtseri Aınagúl Káripova onlaın rejımdegi baspasóz máslıhatynda.
Agenttiktiń ókili óz sózinde medıtsınalyq kerek-jaraqty qalyptan tys qymbatqa satyp alý mysaldaryn atady.
«Pandemııa kezinde medıtsınalyq jabdyqtar men buıymdardy satyp alý máselesi erekshe baqylaýǵa alyndy. Mysaly Shymkent qalasynyń Densaýlyq saqtaý basqarmasy Reseıde shyǵarylǵan «Aventa-M» (12) ókpeni jasandy jeldetý apparatynyń bireýin 21 mln teńgeden astam baǵamen satyp alǵan. Osy kezeńde demeýshilik kómek retinde Shymkent juqpaly aýrýlar aýrýhanasy osy tynys alý apparattaryn 3 mln teńgege arzan satyp aldy. Shymkent qalasy Densaýlyq saqtaý basqarmasynyń satyp alý kólemin eskere otyryp, medıtsınalyq jabdyqtar qunynyń artýy memleketke 40 mln teńgeden astam shyǵyn ákeldi. Bul rette ashyq qaınarkózder derekteri boıynsha Reseıdegi pandemııa kezinde «Avent-M» quny 2 ese arzan boldy. Bul - shamamen 10,3 mln teńge», - deıdi ol.
Budan basqa tynys alý apparatyn qoldanýǵa óndiris eli sanktsııa engizgennen keıin Densaýlyq saqtaý mınıstrligi Qazaqstan aýmaǵynda da toqtatqan.
«Sol sekildi Atyraý oblysy osyndaı fakt anyqtady. Sondaı-aq, ár túrli óńirlerdegi medıtsınalyq mekemeler úshin amerıkada óndirilgen tynys alý (V8600) apparatyn bir jetkizýshiniń («Qazmed Leasing» JShS) 8 mln teńgege deıingi baǵamen satqan faktileri anyqtaldy. Qostanaı oblystyq aýrýhanasy úshin apparat 17,5 mln teńgege, SQO Densaýlyq saqtaý basqarmasy úshin – 19 mln teńgege, Shymkent qalasynyń medıtsınalyq ortalyqtary úshin – 22 mln teńgeden astam shyǵynǵa ushyrady. Al qazir ol 14 mln teńge baǵasymen satylýda. Sybaılas jemqorlyqqa qarsy qyzmettiń suraýhatyna sáıkes, kórsetilgen faktiler boıynsha ishki memlekettik aýdıt organdary tekserýler júrgizýde. Nátıje boıynsha protsestik sheshimder qabyldanady», - dedi ol.
