Shymkent dárigerleri kópirden sekirgen jigittiń ómirin aman alyp qaldy
ShYMKENT. QazAqparat - Shymkentte jas jigit kópirden sekirip, ómirimen qoshtaspaq boldy. Oqıǵa ornyna jetken qyzmeti ony aýyr jaraqattarmen aýrýhanaǵa jetkizdi, dep habarlaıdy QazAqparat HAA tilshisi.
Oqıǵaǵa kýá bolǵandardyń aıtýynsha, 22 jastaǵy jigit Ordabasy alańyndaǵy kópirden sekirgen. Onyń janynda eshkim bolmaǵan. Qazir túrli dene jaraqatyn alǵan turǵyn Shymkent qalalyq jedel járdem aýrýhanasynda em qabyldaýda. Dárigerler naýqastyń jaǵdaıyn «aýyr» dep baǵalaýda.
«Bizge kelip túsken naýqastyń jaǵdaıy aýyr, jansaqtaý bóliminen búgin bólimshege aýystyryldy. Negizinen ish qýysy men keýdesine jaraqat alǵan. Keýdesimen qulaǵan, biraq qabyrǵalary synbaǵan. Esin biledi, sóılep jatyr. Ota jasaldy, biraq júrip-tura almaıdy», - dedi dáriger-hırýrg Abzal Japparbergenov.
Al óńirdiń ІІD baspasóz qyzmetiniń jetekshisi Saltanat Qarakózovanyń sózinshe, osy oqıǵa boıynsha tergep-tekserý amaldary júrgizilýde.
«Ál-Farabı aýdandyq polıtsııa bólimine 1995 jyly týǵan jigittiń kópirden qulaǵany týraly habar tústi. Atalǵan polıtsııa bólimi osy jáıtke baılanysty Qylmystyq Kodekstiń 105-baby («Ózin-ózi óltirýge deıin jetkizý») boıynsha is qozǵady. Jigittiń týǵan-týystary anyqtalyp, jaýap alyndy. Anasynyń aıtýynsha, uly sońǵy eki jyldan beri júıke aýrýyna shaldyqqan eken. Kópirden sekiretindigin jıi aıtyp kelgen. Qalaı bolǵanda da, polıtsııa qyzmetkerleri tergeý sharalaryn júrgizýde. Anyq-qanyǵy keıin belgili bolady», - dep atap ótti Saltanat Qarakózova.
