Shymkent dárigerleri qolynyń súıegi úgitilip ketken jigitke kúrdeli ota jasady

ShYMKENT. QazAqparat – Shymkentte 25 jastaǵy jigittiń qolyn jumys kezinde beton aralystyrǵysh qysyp qalǵan. Qolynyń súıegi úgitilip ketken naýqasqa dárigerler kúrdeli ota jasady, dep habarlaıdy QazAqparat tilshisi.

Qalalyq Densaýlyq saqtaý basqarmasynyń málimetinshe, oń qolynyń súıekteri maıdalanyp ketken naýqasty aýyr halde jedel járdem qyzmeti aýrýhanaǵa jetkizgen. Medıtsına mamandary jas jigittiń ómirin aman alyp qalý úshin shuǵyl túrde ota jasap, qolynyń maıdalanǵan súıekterin jınap bergen. Birinshi kezeńdegi operatsııada hırýrgtar jigittiń qolyndaǵy tamyrlaryn tigip, súıekterin qaıta qalpyna keltirgen.

Araǵa bir aı salyp, gıperbarııalyq oksıgenatsııa ortalyǵynyń hırýrgy Muhıt Dosybaevtyń jetekshiligimen naýqasqa ekinshi kezeńdi kúrdeli ota jasalǵan. Naqtyraq aıtqanda, deneniń basqa jerinen teri alynyp, qolyna japsyrýǵa týra kelgen.

Dárigerdiń aıtýynsha, teri júz paıyz jabysqan. Dárigerler naýqastyń qazirgi jaǵdaıyn qanaǵattanarlyq dep baǵalaýda. Jas jigit búginde oń qolyn qalpyna keltirgen dárigerge rızashylyǵyn bildirýde.