Shymkent dárigerleri 4 jasar balanyń asqazanynan bir ýys shash aldy
Shymkent qalalyq Densaýlyq saqtaý basqarmasynan málim etkendeı, 9 aqpan kúni qalalyq klınıkalyq balalar aýrýhanasyna jedel járdemmen 4 jasar qyz jetkizilgen. Ata-anasynyń aıtýynsha, balaqaıdyń asqazany aýyryp, mazasyzdanyp júrgen.
«Dárigerler balanyń asqazanyn FGDS apparatymen tekserip, ishte bógde zat bar ekenin anyqtady. Buǵan qosa, naýqasta aýyr dárejeli qan azdyǵy bolǵan. Іshtegi bógde zatty alý úshin hırýrgtar operatsııanyń aldynda naýqasqa qan quıdy. Keıinnen otaǵa daıyndap, úshinshi táýlikte qyz balaǵa operatsııa jasaldy.
Medıtsına mamandary otany ashyq túrde jasap, 4 jasar qyzdyń asqazanynan uzyndyǵy 18 sm bolatyn bir ýys shash alyp shyqty», - dedi basqarmadan.
Kúrdeli otany qalalyq klınıkalyq balalar aýrýhanasynyń bilikti mamandary – hırýrgtar Sultanǵalı Sarybaı, Ákim Túlkibaev, anestezıolog-dáriger Shuhrat Qurbanbaev jasaǵan.
«Shashtyń kólemi úlken bolǵany sonshalyq asqazannyń 90 paıyzyn jaýyp qalǵan. Sonyń saldarynan bala durys tamaqtana almaı, mazasyzdanǵan. Operatsııa sátti ótti. Qazir qyzdyń jaǵdaıy jaqsy. Ata-analarǵa aıtarymyz, balany qaraýsyz qaldyrmańyzdar», - deıdi hırýrg Ákim Túlkibaev.
Qazir baldyrǵan dárigerlerdiń baqylaýynda. Ony apta sońynda úıine shyǵarý josparlanýda.
