Shymkent blokpostarynda turǵyndar tóbeles shyǵarǵan

ShYMKENT. QazAqparat – Shymkentte blokposttaǵy polıtseılerge qarsylyq tanytyp, jaǵa jyrtysqan úsh azamatqa qatysty qylmystyq is qozǵaldy. Bul týraly qalalyq Polıtsııa departamentiniń bastyǵy Eraly Jumahanbetov jýrnalısterge uıymdastyrylǵan press-týr kezinde málim etti, dep habarlaıdy QazAqparat tilshisi.

Departament bastyǵynyń aıtýynsha, ústerinen qylmystyq is qozǵalǵan úsh adam tártip saqshylarymen tóbelesýge deıin barǵan.

Jalpy Shymkentte karantın rejımin buzǵan 842 turǵynǵa qatysty ákimshilik hattama toltyrylǵan. Olardyń arasynda 61 adam qamaýǵa alynsa, 120 adamǵa aıyppul salynǵan. 127 turǵynǵa eskertý berilip, 100-ge tarta avtokólik aıyppul turaǵyna qoıylǵan. Juqpaly derttiń taralý qaýpine qaramastan turǵyndar qalada ruqsatsyz júrip, maska taqpaıtyny anyqtalǵan. Saýda núkteleri men qoǵamdyq tamaqtaný oryndary ýaqytyly jabylmaı, sanıtarlyq normalardy saqtamaǵan.

«Qala aýmaǵynda koronovırýs ınfektsııasynyń taralýyna jol bermeý sharalaryna Polıtsııa departamentiniń 1206 qyzmetkeri jumyldyrylǵan. Qalanyń kireberis joldaryna 18 blokpost qoıylsa, qala kósheleriniń qıylystarynda 20 beket bar»,- deıdi Eraly Jumahanbetov.