Shymkent bazarlarynda mekteptiń móri basylǵan kitaptar satylyp jatyr

ShYMKENT. QazAqparat - Shymkenttiń bazarlarynda mekteptiń móri basylǵan kitaptar saýdalanýda. Osyndaı oqýlyqtar men qosymshalardyń sýretin qala turǵyndary áleýmettik jelilerge saldy, dep habarlaıdy QazAqparat tilshisi.

Whatsap jelisine taralǵan kitapshalarda Saryaǵash jáne Saıram aýdanyndaǵy mekteptiń mórin kórýge bolady. Oqý jylynyń basynda qyzý talqyǵa túsken máselege búgin Túrkistan oblystyq bilim basqarmasynyń ókilderi túsinikteme berdi. Resmı málimdemege sáıkes, oqýǵa qosymsha jumys quralyndaǵy mektep móri Saryaǵash aýdanyndaǵy orta mekteptiń ataýymen sáıkes keledi.

«Áleýmettik jelide taraǵan aqparatqa baılanysty oblys aýmaǵyndaǵy kitap satý oryndary jeke kásipkerlerdiń menshiginde. Oqýǵa qosymsha jumys quralyndaǵy mektep móri Saryaǵash aýdanyndaǵy orta mekteptiń ataýymen sáıkes keledi. Biraq, Saryaǵash aýdany oqýshylarǵa osy oqý jylynda tegin taratylatyn, mekteptiń kitaphanasyna ótkiziletin dápter satyp almaǵandyǵyn habarlaımyz. Sonymen qatar, bul quraldar ata-analardan talap etilmeıdi. Oryn alǵan máselege qatysty búginde oblystyq bilim basqarmasynan arnaıy zerdeleý toby óz jumysyn bastady. Nátıjesi qosymsha habarlanatyn bolady»,- delingen Túrkistan oblystyq bilim basqarmasy taratqan habarlamada.