Shymkent bazarlarynda elektrondy úkimet portalynyń ózine-ózi qyzmet kórsetý buryshy ashyldy

ASTANA. QazAqparat - Shymkent qalasynda memlekettik qyzmetterdi alý kezinde azamattardy elektrondy úkimet portalyn belsendi paıdalanýǵa tartý maqsatynda «Qyrǵy» jáne «Aına» saýda bazarlarynda ózine-ózi qyzmet kórsetý buryshtary jumys isteı bastady.

Bul jaıynda QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Shymkent qalalyq departamentinen málim etti, dep habarlaıdy QazAqparat tilshisi.

Atalǵan joba QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń Shymkent qalalyq departamentiniń bastamasymen «Azamattarǵa arnalǵan úkimet» memlekettik korporatsııasy» AQ Shymkent qalalyq fılıalynyń belsendi qatysýymen iske qosyldy.

Bul qyzmet buryshtary halyq kóp shoǵyrlanǵan jerlerde uıymdastyrylyp, Halyqqa qyzmet kórsetý ortalyqtarynda elektrondy tsıfrlyq qoltańbany qajet etpeıtin kóp suranysqa ıe anyqtamalardy alý kezinde uzaq kezekti boldyrmaý maqsatynda qyzmet etedi.

«Atalǵan qyzmet kórsetý buryshtarynda HQKO arnaıy mamandary bekitilip, azamattarǵa «Elektrondy úkimet» portaly jáne telegram mobıldik qosymshasy arqyly kórsetiletin memlekettik qyzmetterdi alý múmkindigi men olardyń qoljetimdiligi týraly nasıhattyq jumystar júrgizilýde», - dedi departament basshysy Álı Kómekbaev.

Búgingi kúni elektrondyq úkimet portaly arqyly 500-den astam elektrondyq qyzmet qol jetimdi.

Munan bólek, Shymkenttiń «Samal bazary», «Bekjan bazary», «Tulpar avtobólshek bazary» jáne «Avto-Nur bazary» saýda oryndarynda da ózine-ózi qyzmet kórsetý buryshtaryn ashý josparlanýda.