Shymkent aýmaǵyna kólik pen azamattardyń kirip-shyǵýyna shekteý qoıyldy
Shahar basshysynyń habarlaýynsha, Shymkent qalasynyń eki turǵyny qaýipti indetti juqtyrǵany qatty alańdaýshylyq týǵyzyp otyr. Qazir naýqastar qalalyq ınfektsııalyq aýrýhanada emdelýde, densaýlyqtary birqalypty. Al, qaýipti indettiń taralyp ketpeýi úshin olar turǵan eldi meken oqshaýlanady.
«Ol adamdarmen baılanysta bolǵan 26 adam karantınge jatqyzylyp, test saraptamasy alyndy. Qazirgi tańda nátıjesi kútilýde. Osy eki adamnyń turǵylyqty jaıy qalaǵa qarasty Abaı aýdany, «Táýelsizdikke 20 jyl» turǵynalaby bolǵandyqtan, osy eldi meken 14 kúnge karantınge jabyldy. Sonymen qatar, qaladaǵy avtovokzal men avtobeketterdiń jáne balabaqshalardyń jumysy ýaqytsha toqtatyldy», - dedi Murat Áıtenov.
Qala ákimi sonymen qatar ınfektsııanyń taralýyna jol bermeý úshin, 28 naýryzda túngi saǵat 00:00-den bastap shaharda biratar shekteý sharalary engiziledi. Bul sharalar Qazaqstan Respýblıkasy Prezıdenti janyndaǵy Tótenshe jaǵdaı rejimin qamtamasyz etý jónindegi Memlekettik komıssııanyń kelisimine sáıkes júrgiziledi.
«Birinshiden, Shymkent qalasy áýejaıynyń, temirjol vokzalynyń jumystary, avıa jáne temirjol qatynastary tolyq toqtatylady. Sonymen qatar, avtokólik bazarlary, azyq-túlik jármeńkeleri, mobıldi telefon satatyn dúkenderdiń jumysy toqtatylady. Bul rette, qala turǵyndary men qonaqtaryna, kommertsııalyq jáne kommertsııalyq emes uıymdarǵa menshik túrine qaramastan barlyq jaılarda, turǵyn úılerde jáne aýmaqtarda, dinı nysandarda jeke, otbasylyq, eske alý is-sharalaryn jáne basqa da saltanattar, jıyndar ótkizýge qatań tyıym salynady. Barlyq saýda nysandaryna óz taýarlary men qyzmetterin satýda onlaın rejámge kóshýdi usynamyn»,- dedi qala ákimi Murat Áıtenov.
Ekinshiden, buǵan deıin qyzmetine shekteý engizilgen barlyq saýda jáne basqa da nysandarda, kelýshiler men satýshylar úshin medıtsınalyq betperdelerdi kııýdi talap etetin sanıtarlyq jáne dezınfektsııalyq sharalar kúsheıtiledi. Sonymen qatar, mal bazarlary tek jeksenbi kúni saǵat 11:00-den 17:00-ge deıin jumys isteıtin bolady.
«Úshinshiden, qoǵamdyq tamaqtaný oryndarynyń (kafe, meıramhana jáne taǵy basqalar) qyzmetine kúndizgi saǵat 10:00-den 18.00-ge deıin shekteý engiziledi. Al, saǵat 18-den 22-ge deıin qoǵamdyq tamaqtaný oryndarynyń jumysyn «taǵamdardy úıge jetkizý jáne ózimen alyp ketý» rejiminde júzege asyrylady. Sondaı-aq, tamaqtaný oryndary kireberiste klıentterdiń temperatýrasyn baqylaýǵa jáne qoldaryn sanıtarlyq óńdeýge mindetti. Klıentterdi «kelýshiler arasynda bir bos ústel qashyqtyǵy» formaty boıynsha, zalda 50 adamnan aspaı otyrǵyzýǵa mindetti. Tórtinshiden, Shymkent qalasynyń aýmaǵyna saǵat keshki 21.00-den tańǵy saǵat 07:00-ge deıin avtokólikter men azamattardyń kirýine jáne shyǵýyna tyıym salynady. Bul shekteýlerdiń tranzıttik kólikter men azyq-túlik tasymaldaıtyn kólikterge qatysy joq. Besinshiden, qaladaǵy qoǵamdyq kólikterdiń jumysy tańǵy saǵat 06:00-den 21:00-ge deıin shekteledi»,- dedi qala ákimi Murat Áıtenov.