Shymkent áýejaıynda 700-den astam adam jolǵa shyǵa almaı otyr
Saıttaǵy derekterge qaraǵanda, áýe reısteriniń toqtatylýyna qalyń tuman sebep bolǵan.
Shymkent áýejaıynan alynǵan málimetterge qaraǵanda, 5 reıstiń ushý ýaqyty keıinge shegerilgen. Ushaqqa minetin jolaýshylar sany 324 adam. Elordaǵa qatynaıtyn taǵy eki ushaqtyń ushýyna múldem tyıym salynǵan. Ásirese Shymkentten Almatyǵa saparlaıtyn jolaýshylarǵa qıyn boldy. 134 adam óziniń reısin tańǵy saǵat 10:00-den beri kútip júr. Olardyń arasynda balalar da bar, reıs 12 saǵatqa keıinge qaldyrylǵan. Osy sebepterge baılanysty Shymkent áýejaıy adamdarǵa lyq toldy.
Bul jaǵdaıǵa baılanysty Air Astana áýe kompanııasynyń ókilderi de pikir bildirdi.
«Ushyp-qoný alańyn tuman basyp tur. Jol kórinbeıdi. Air Astana áýe reısi tańǵy saǵat 10:15-te Almatyǵa ushýy qajet bolatyn. Alaıda reıs túngi 00:25-ke qaldyryldy. Bunyń ózi naqty emes. Óıtkeni kún raıy ońalǵan joq. Reıs 6 saǵattan kópke keshiktirilse, jolaýshylardyń bılet qunyn tolyqtaı alýǵa quqy bar. Sondyqtan kóp jolaýshylar bıletterin ótkizdi. Ázirge kún raıynyń ońalatyn túri joq. Jolaýshylarǵa ystyq tamaq berildi, qonaqúıden oryn berilgen joq, óıtkeni, jaǵdıdyń bulaı bolǵanyna áýe kompanııasy kináli emes. Bul aýa raıyna baılanysty jaǵdaı. Al bılet qunyn qaıtaryp berip jatyrmyz»,-dep habarlady áýe kompanııasynyń baspasóz qyzmeti.
Sınoptıkterdiń málimetinshe, tuman 12 qarasha kúni de seıilmeýi múmkin. Jol kórinbeıdi. Shymkent qalasynyń Tótenshe jaǵdaılar departamenti eskertý jasady.