«Shymkent arýy - 2017» baıqaýynyń jeńimpazy anyqtaldy
ShYMKENT. QazAqparat - Elimizdiń ońtústiginde «Shymkent arýy - 2017» ulttyq arýlar baıqaýy ótti. Qala ákimdigi uıymdastyrǵan sulýlar saıysyna 16-21 jas aralyǵyndaǵy 18 boıjetken qatysty, dep habarlaıdy QazAqparat tilshisi.
Jyl saıyn dástúrli túrde ótetin sharany tanymal akter Táýekel Múslim men telejúrgizýshi Irına Ten júrgizdi. Baıqaýǵa arýlar bir aıdan astam ýaqyt daıyndyq jasap, birneshe synnan ótti. Aqylyna kórki saı ekenin dáleldep, saıys qortyndysy boıynsha jeńimpazdar tańdap alyndy.
Qazylar alqasy qatysýshylardyń arasynan ońtústiktiń naǵyz has sulýy, ońtústikke laıyqty arýdy tańdaýǵa tyrysty. Olardyń sheshimimen «Shymkent arýy - 2017» baıqaýynyń jeńimpazy bolyp M.Áýezov atyndaǵy Ońtústik Qazaqstan memlekettik ýnıversıtetiniń stýdenti Aıǵanym Nııazbek atandy.
Ol buǵan deıin de birneshe baıqaýlarǵa qatysyp kelipti. Sońǵy ret «Face of Central Asia 2017» baıqaýynyń jeńimpazy atanǵan. Shymkent arýy bul joly 150 myń teńge kóleminde júlde qoryn ıemdenip, keler jyly kóktemde Astana qalasynda ótetin respýblıkalyq «Qazaqstan arýy» baıqaýyna joldama aldy.
