Shymkent ardagerleri mereke qurmetine 1,1 mln teńgeden alady

ShYMKENT. QazAqparat – Shymkentte Ekinshi dúnıejúzilik soǵys ardagerlerine beriletin birrettik qarjy kólemi belgili boldy. Bıyl maıdangerler 360 aılyq eseptik kórsetkish mólsherinde, ıaǵnı 1 110 680 teńgeden kómek alady, dep habarlaıdy QazAqparat tilshisi.

«Bul qarajat ardagerlerdiń esepshottaryna aýdarylady. Ony alý úshin eshqandaı qujat jınaýdyń qajeti joq. Sebebi, biz zeınetaqy tóleý ortalyǵynan arnaıy tizim alamyz. Sondaı-aq qalada soǵys ardagerlerine teńestirilgen azamattar bar. Olarǵa 36 AEK – 110 260 teńgeden tólenedi. Budan bólek 2500-den astam tyl ardagerine 12 AEK beriledi, ol – 36 756 teńge. Bul qarajattar da birrettik esepshottaryna túsedi»,- deıdi qalalyq jumyspen qamtý jáne áleýmettik qorǵaý basqarmasynyń bólim basshysy Uldana Bekbaý.

Qarjylaı kómekten buryn atalǵan azamattarǵa shıpajaılarǵa da joldamalar beriledi. Sondaı-aq jylyna eki ret basylymdarǵa jazylýǵa múmkindigi bar. Aıta keteıik, qaladaǵy ardagerler sany jyl sanap azaıyp keledi. Qazir úshinshi megapolıste 7 soǵys ardageri turyp jatyr. Olardyń eń qarty bıyl jeltoqsan aıynda 100 jasqa tolady. Al ótken jyly osy ýaqytta 21 soǵys ardageriniń kózi tiri edi.