Shymkent ákimi «Juldyz» ındýstrııaldy aımaǵyn qurý boıynsha naqty tapsyrmalar berdi

ShYMKENT. QazAqparat - Shymkent qalasynyń ákimi Murat Áıtenovtiń tóraǵalyǵymen ótken májiliste qaladaǵy ındýstrııalyq, agroındýstrııalyq jáne kólik-logıstıkalyq aımaqtar men arnaıy ekonomıkalyq aımaqtardyń 2020 jyly atqarǵan qyzmetteri men aldaǵy damý jospary talqylandy, dep habarlaıdy qalalyq ákimdiktiń baspasóz qyzmeti.

Atap aıtqanda, «Juldyz» ındýstrııalyq aımaǵyn qurý, «Ońtústik», «Tassaı» ındýstrııalyq aımaqtary men kólik-logıstıkalyq aımaǵyn damytý, «Bozaryq» agroındýstrııalyq aımaǵy boıynsha máseleler qaraldy.

2020 jyly Shymkent qalasyna 278 mlrd.teńge ınvestıtsııa tartylyp, ótken jylmen salystyrǵanda ósim 40%-ǵa artqan. Bıylǵy jospardy 315 mlrd teńgege jetkizý bekitilip otyr.

«Investıtsııa tartýdyń birden-bir joly – ındýstrııalyq jáne arnaıy ekonomıkalyq aımaqtardy damytyp, ınvestorlarǵa qolaıly jaǵdaı jasaý, ınvestıtsııalyq múmkindikterdi barynsha qalyptastyrý. Juldyz ındýstrıaldy aımaǵy Shymkent qalasynyń tarıhyndaǵy eń myqty jobalardyń biri bolmaq. Injenerlik ınfraqurylym júıelerin (Elektr qýattylyǵy jáne sapaly gazben qamtý) sapaly oryndaýdy tapsyramyn. Qajetti ınfraqurylymdar boıynsha jobalaý-smetalyq qujattama men saraptamalyq qorytyndy alynyp, tıisti bıýdjettik ótinim berilýi tıis. Keleshektegi damý josparlary boıynsha ınfraqurylym júıeleri qazirden myqtap qolǵa alynýy kerek», – dedi qala ákimi.

Shahar basshysy 306 ga jer ýchaskelerin tolyǵymen memlekettik muqtajǵa qaıtaryp, ınvestorlarǵa daıyn óndiris parkin (Brownfield, Greenfield) qurý boıynsha usynystar engizý, 50 jańa joba tartý jumystaryn júrgizýge tapsyrma berdi. Sondaı-aq, aımaqtyń bolashaq josparlaryn qazirden damytyp, barlyq jobalarǵa daıyn bolý kerek ekenin aıtty.