Shymkent ákimi oqýshylar ýlanǵan mektepti baryp kórdi
Ákim onda Tótenshe jaǵdaıdyń shyǵý sebepterin anyqtaý jónindegi jumystardyń atqarylý barysymen tanysty, dep habarlaıdy QazAqparat tilshisi.
Shahar basshysy mektepti tolyq aralap shyǵyp, Yntymaq shaǵyn aýdanyndaǵy gaz taratý pýnktinde boldy.
Qalalyq ákimdiktiń habarlaýynsha, mektepte tabıǵı gazdyń taralýy jónindegi boljam rastalmaǵan.
«Mamandar mektep ishi men syrtyndaǵy aýanyń synamasyn alyp, laboratorııalyq tekserýden ótkizdi. Mekteptiń sanıtarlyq ahýaly qalypty, adam densaýlyǵyna keler qaýip joq. Oqıǵanyń mán-jaıyn anyqtaý jónindegi jumystar odan ári jalǵasady. Búgin mekteptiń jumysy toqtatylyp, sabaqtar erteń 20 naýryzdan bastap jumysyn jalǵastyratyn bolady. Bilim oshaǵynda tıisti sala mamandary jumys istep jatyr. Jaǵdaı qala ákiminiń turaqty baqylaýyna alynǵan», delingen habarlamada.
Al, búgin qaladaǵy gazǵa jaýapty mekeme «QazTransGaz Aımaq» AQ resmı túrde tótenshe jaǵdaıǵa gaz ıisiniń taralýy sebep bolmaǵanyn jetkizdi.
Osyǵan qaraı, «QazTransGaz Aımaq» AQ tabıǵı gaz arqyly mundaı tótenshe jaǵdaıdyń bolýy múmkin emestigin resmı málimdeıdi. Birinshiden, QR Ulttyq ekonomıka mınıstrligi bekitken «Qalalyq jáne aýyldyq eldi mekenderdegi atmosferalyq aýaǵa qoıylatyn sanıtarlyq-epıdemıologııalyq talaptarǵa» saı, tabıǵı gazdyń (metan) qaýiptiligi IV sanatqa jatady jáne ol ýlandyrýshy gaz bolyp sanalmaıdy. Ashyq aýada bir jerde jınaqtalyp turmaıtyndyqtan, eldi mekender aýasyn lastaıtyn tizimge de enbegen. Tabıǵı gazdy ýly gazben shatastyrmaý kerek! Ekinshiden, gaz taratý jáshiginen mektepke deıingi 600 metr aralyqqa aýadan jeńil gazdyń jetýi múmkin emes, ol birden aýaǵa tarap ketedi. Sondyqtan, 600 metr jerden ushyp jetken gaz qandaı da bir bólmege (mekteptiń ishine) jınaldy degen tipti qısynǵa kelmeıdi.
Osy rette, «QazTransGaz Aımaq» AQ apattyq-dıspetcherlik qyzmeti oqıǵa ornyna dáldigi óte joǵary gaz mólsherin esepteıtin «Pergam» zerthanasyn jiberdi. Júrgizilgen tekserýler mektep janynda, mektep aýmaǵynda, tipti stansa mańynda da gazdyń taralǵanyn anyqtaǵan joq.
Eske salaıyq, keshe Yntymaq yqsham aýdanyndaǵy N54 mektepte oqýshylar men mektep qyzmetkerleri jappaı ýlanyp, toksıkologııalyq aýrýhanaǵa túsken bolatyn.
Emdeý mekemesine túsken 41 bala men 4 eresek adamnyń bas aınalý, qusý jáne qysqa ýaqytta esten taný belgileri bolǵan. Bastapqy medıtsınalyq kómek kórsetilgennen keıin barlyǵy úılerine jiberildi. Al, búgin elimizdiń bas sanıtar-dárigeri Jandarbek Bekshın bul jaǵdaıǵa mektepten 600 metr qashyqtyqta ornalasqan taratý stansasynan tabıǵı gazdyń shyǵýy sebep bolǵanyn atap ketken bolatyn.
