Shymkent ákimi oqýshylar sýıtsıdine qatysty pikir bildirdi
ShYMKENT. QazAqparat - Aldaǵy ýaqytta Shymkentte oqýshylary óz-ózine qol jumsaǵan mekteptiń dırektorlary jumystan bosatylady. Bul týraly qala ákimi Nurlan Saýranbaev qoǵamdyq keńes otyrysynda aıtty, dep habarlaıdy QazAqparat tilshisi.
Keńeste sóz sóılegen shahar basshysy bilim mekemelerindegi joǵary synyp oqýshylarynyń aqsha jınaý derekterine toqtaldy.
«Sońǵy eki jaǵdaı boıynsha qylmystyq is qozǵaldy. Bul jaǵdaıdyń qalaı órbigenin, úlkenderdiń kishilerge álimjettik tanytýyn arnaıy ınspektor, muǵalimder, dırektordyń bilmeýi múmkin emes»,- dedi qala ákimi.
Ákimniń sózine qaraǵanda, budan bylaı qala mektepterinde osyndaı oqıǵalar bolyp, dáleldengen jaǵdaıda bilim mekemeleriniń basshylary tikeleı jaýap beretin bolady. ıAǵnı, balalardyń aqsha jınaý nemese sol sııaqty túrli keleńsiz jaǵdaılarǵa baılanysty sýıtsıdke barǵan jáıtter úshin mektep dırektorlary qyzmetinen ketetin bolady.
«Qazirgi oryn alǵan eki jaǵdaı boıynsha mektep basshylaryna eskertý berdik. Kelesi joly mektep dırektorlary birden qyzmetinen bosatylady»,- dedi Nurlan Saýranbaev.
Esterińizge sala keteıik, aǵymdaǵy jyldyń aqpan aıynda qalada 8 jáne 11 synyptyń oqýshylary óz-ózderine qol jumsap, qaıtys bolǵan edi. Baqılyq bolǵan 11 synyptyń oqýshysy ólerdiń aldynda mektepte álimjettiktiń bar ekenin jáne onyń mundaı áreketke barýyna sebepker retinde birqatar oqýshylardyń aty-jónderin jazyp ketken bolatyn. Qazir eki jaǵdaı boıynsha da quzyrly organdar tarapynan tıisti tekserister júrgizilýde.
